Sharada Trishati | శారదా త్రిశతి

పరమాభరణం ధాతుర్వదనాంభోజస్య శారదా దేవీ |

యా రాజతి జననీ సా లసతు సదా సుప్రసన్నా నః   || 1  ||

సా శారదా ప్రసన్నా రాజతి మమ మానసే నిత్యం |

యా శారదాబ్జవదనా జననీ కీర్త్యా హి సర్వలోకానాం   || 2  ||

సంపద్ దివ్యా ధాతుః ఖ్యాతా సా శారదా దేవీ |

యద్భజనం దేవానామపి తత్త్వజ్ఞానదం విదుర్విబుధాః   || 3  ||

సరసకవితావిభూత్యై యత్పదమారాధ్యతే విశేషజ్ఞైః |

సా శారదా శ్రియై నః కాలే సర్వప్రసన్నాత్మా   || 4  ||

నీలారవిందలోచనయుగలా సా శారదా దేవీ |

కరకమలకలితవీణా సదా ప్రసన్నా శ్రియైః వః స్యాత్   || 5  ||

కలయే తామహమనిశం ఫుల్లాబ్జవిలోచనాం వాణీం |

యా సృష్ట్యాదౌ సాహ్యం కలయతి ధాతుర్జగన్మాతా   || 6  ||

యస్యా లీలాలోలః పద్మాసనగోఽపి వేదపాఠరతః |

తామహమతులానందప్రాప్త్యై కలయే మనఃపద్మే   || 7  ||

బ్రహ్మాణం తాం వాణీమేకాసనభాసురాం శ్రియః ప్రాప్త్యై |

ఆరాద్విలోక్య మానసమానందరసం పరం భజతే   || 8  ||

ముక్తామయే విమానే పద్మాసనయంత్రికామధ్యే |

దృశ్యాం వాణీం దేవీం సేవే సంతతసుఖప్రాప్త్యై   || 9  ||

భాగ్యాన్మమ చ కవీనాం సా దేవీ దృశ్యతామేతి |

వీణాపుస్తకహస్తా యా కమలాసనపురంధ్రీ హి   || 10  ||

మామకమానసకీరం బధ్నీయాశ్చరణపంజరే మాతః |

తేన మమ జన్మలాభః స్తోత్రం చ తవ ప్రకామకలితార్థం   || 11  ||

సంవిత్ప్రరోహకలికాప్రాప్త్యై తాం నౌమి శారదాం దేవీం |

యా కిల కవీశ్చరాణామధినేత్రీ కావ్యకలనాదౌ   || 12  ||

భక్తానాం జిహ్వాగ్రం సింహాసనమాదరాద్ వాణీ |

కలయంతి నృత్యతి కిల తతస్తు తన్నూపురనినాదః   || 13  ||

మంజులఫణితిఝరీతి ప్రగీయతే దిక్తటే రసికైః |

ప్రాతఃఫుల్లపయోరుహమరందరసకేలిధూర్వహా కాలే   || 14  ||

దుర్వారగర్వదుర్మతిదురర్థనిరసనకలానిపుణాః |

మాతస్తవ పాదయోరుహసేవాధన్యతాం ప్రాప్తాః   || 15  ||

నీచా మమ తు మనీషా తథాపి తవ నుతికలాప్రవృత్తోఽస్మి |

అంబ తవ తత్ర హేతుః కృపాం పరం బుద్ధిదా జయతి   || 16  ||

విధిదయితే తవ మాతః స్తుతౌ న శక్తా అపి త్రిదశాః |

క్షంతవ్యమత్ర దయయా మమ చాపల్యం తవ స్తోత్రే   || 17  ||

శుకవాణీమివ మాతర్నిరర్థకాం మద్వచోభంగీం |

సదసి శృణోషి దయయా తత్ తవ చోత్తమపదవ్యక్త్యై   || 18  ||

పరదేవతే ప్రసీద ప్రాణేశ్వరి ధాతురంబ మమ వాణీం |

కృపయా తవ నుతియోగ్యాం త్వన్నూపురనినదరమ్యరసగుంఫాం   || 19  ||

సర్వజ్ఞత్వం సంపదమథవాన్యాం ప్రాప్తుమత్ర తవ మాతః |

తవ చరణకమలమేతచ్ఛరణం నాన్యా గతిర్దృష్టా   || 20  ||

మందధియా స్వల్పాపి స్తుతిరంబ నిరర్థకాపి రసహీనా |

కలితా చేత్ తవ కృపయా తదేవ సదసీడితం భాతి   || 21  ||

కుంఠీకరోతు విపదం చాజ్ఞానం దుర్గతిం వాణి |

తవ చరణకమలసేవాదరో జనానాం కలౌ కాలే   || 22  ||

వీరశ్రీర్విద్వచ్ఛ్రీర్జయశ్రియో వామరైర్మాన్యే |

తవ పాదాంబుజసేవాదరేణ సిధ్యంతి నాన్యథా లోకే   || 23  ||

కరుణారసవర్షిణి తే చరణసరోజద్వయం నిధేహి మమ |

మస్తకతలే విదారితజరాదికం సపది జన్మ సార్థం మే   || 24  ||

శ్రద్ధాం మేధాం సంపదమన్యామమరేంద్రమాననీయాం హి |

దయయా విధేహి కాలే భక్తానాం నస్త్వదేకశరణానాం   || 25  ||

ప్రేయసి ధాతుర్జగతాం పరమేశ్వరి వాణి మాతరంబ నను |

తవ నామాని ఫణంతస్త్రిదశైః సహ యాంతి యానేన   || 26  ||

తవ నామ యస్య జిహ్వాంగణే విశుద్ధం క్షణం స్ఫురతి |

స హి వంద్యస్త్రిదశైరపి విగలితపాపః పరే లోకే   || 27  ||

నతనాకీశ్వరవనితామౌలిస్రగ్గలితమకరందైః |

స్నిగ్ధపదాంబుజయుగలా వాణీ దేవీ శ్రియో హి లసతి పరా   || 28  ||

విదుషామపి తుష్టికరం నవనవరసగుంఫనం కవిత్వం తు |

యత్కరుణావీక్షణతో సిధ్యతి తాం శారదాం వందే   || 29  ||

అంబ ప్రసీద పరమం మాయామేతాం నిరస్య నతిభాజః |

మమ సంవిధేహి మధురాం వాచం తవ నుతికలార్హాం చ   || 30  ||

వాణీ మాతా జగతాం వాణీపుస్తకకరాంభోజా |

హంసాశ్రితా హి నమతాం శ్రేయఃసిధ్యై ప్రసన్నా నః   || 31  ||

శ్లాఘ్యా సంపత్కాలే వైదుష్యం వా యదీయవీక్షణతః |

సిధ్యంత్యపి దేవానాం తాం వందే శారదాం దేవీం   || 32  ||

విద్యాదానకరీయం కమలాసనపుణ్యపరిపాకః |

మమ మనసి సంనిధత్తాం దివ్యజ్ఞానాదిసిధ్యై హి   || 33  ||

దివ్యజ్ఞానం దయయా విధేహి మాతర్మహాసారం |

తేనైవ తే తు కీర్తిర్దానఫలం నశ్చ జన్మసాఫల్యం   || 34  ||

ద్వాదశబీజాక్షరగాం మంత్రోద్ధారక్రియాశక్తిం |

వాణీం విధేస్తు పత్నీం మధ్యే పశ్యామి బింబమధ్యస్థాం   || 35  ||

రవికోటితేజసం తాం సరస్వతీం త్ర్యక్షరక్రియాశక్తిం |

అణిమాదిదాం ప్రసన్నామంబాం పశ్యామి పద్మమధ్యగతాం   || 36  ||

జగదీశ్వరి భారతి మే ప్రసీద వాణి ప్రపన్నాయ |

అహమపి కుతుకాత్ తవ నుతికలనేఽశక్తశ్చ మందధిషణశ్చ   || 37  ||

మునిజనమానసపేటీరత్నం ధాతుర్గృహే రత్నం |

వాణీతి దివ్యరత్నం జయతి సదా కామధుక్ కాలే   || 38  ||

అజ్ఞానవ్యాధిహరం తదౌషధం శారదారూపం |

యః పశ్యతి స హి లోకే పరాత్మనే రోచతే కాలే   || 39  ||

కమలాసననయనఫలం సృష్ట్యాదికలాసమాసక్తం |

వాణీరూపం తేజః స్ఫురతి జగచ్ఛ్రేయసే నిత్యం   || 40  ||

హంసగతిం తామంబామంభోరుహలోచనాం వందే |

తిలకయతి యా గురూణాం జిహ్వాసింహాసనం వాణీ   || 41  ||

వాణి తరంగయ లోచనవీక్షణశైలీం క్షణం మయి భోః |

మమ జన్మ లబ్ధవిభవం తేన భవేన్నైవ తే హానిః   || 42  ||

పద్మాసనేన సాకం కాలే వాణీ సమాసనా జయతి |

కుచకలశనమితదేహా కుర్వంతీ భద్రసంతతిం నమతాం   || 43  ||

వ్యాతన్వానా వాణీ కవీశ్వరాణాం మనోజ్ఞవచనఝరీం |

జయతి విధిసుకృతసంతతిపరిణమితమాలా బుధైర్వంద్యా   || 44  ||

కమలసుషమాంగయష్టిః సా దేవీ జయతి పద్మమధ్యతలే |

శతబీజాక్షరలసితం దిక్పతికృతరక్షకం చ మేరుముఖం   || 45  ||

వాణీయంత్రం విబుధైర్మాన్యం యోగాసనాబ్ధీందుం |

హ్రీమక్షరముఖమాద్యం ప్రాక్తటకలితం చ పద్మమధ్యతలే   || 46  ||

తన్మేరుచక్రరూపం సమాధిదృశ్యం చ లోకవేద్యం చ |

సైషాశ్రిత్య తదేతద్ రాజతి రాజీవలోచనా వాణీ   || 47  ||

హంసాశ్రితగతివిభవా మందస్మేరా తమోనిహంత్రీ చ |

మధురతరవాఙ్నిగుంఫా వీణాపుస్తకకరాంభోజా   || 48  ||

వీణావాదనరసికా నమతామిష్టార్థదాయినీ వాణీ |

ధాతుర్నయనమహోత్సవకలికా కుర్యాచ్ఛుభం జగతాం   || 49  ||

తాపింఛరమ్యదేహశ్రీరేషా కవిసమాజనుతా |

అష్టైశ్వర్యాదికలాదానే దత్తేక్షణా జయతి   || 50  ||

సృష్ట్యాదౌ విధిలిఖితం వాణీ సైషా హి చాన్యథాకర్తుం |

నాకౌకసామపీహ ప్రభవతి కలితప్రణామానాం   || 51  ||

యః పశ్యతి తామేతాం వాణీం పురుషో హి ధన్యతామేతి |

యం పశ్యతి సైషాయం నితరాం ధన్యో నృపేడితః కాలే   || 52  ||

కబలితతమఃసమూహా వాణీ సైషా హి విజయతే జగతి |

అపునర్భవసుఖదాత్రీ విరించిముఖలాలితా కాలే   || 53  ||

కమలాసనముఖకమలస్థిరాసనాం శారదాం వందే |

యన్నామోచ్చరణకలావిభవాత్ సర్వజ్ఞతా నియతం   || 54  ||

భవపరమౌషధమేతద్వాణీరూపం సదారాధ్యం |

కమలాసనలోచనగణసరసక్రీడాస్పదం జయతి   || 55  ||

నారీవంశశిఖామణిరేషా చింతామణిర్నతానాం హి |

ధాతృగృహభాగధేయం ధ్యేయం సద్భిః శ్రియః సమృద్ధ్యై నః   || 56  ||

జనని భువనేశ్వరి త్వాం వాణీం వందే కవిత్వరససిద్ధ్యై |

త్వం తు దదాసి హి దయయా మమ మందస్యాపి వాగ్ఝరీర్మధురాః   || 57  ||

ఏతేన తవ తు కీర్తేర్మహిమా సంగీయతే దిశాం వలయే |

కింనరవర్గైరమరీకన్యాభిః కల్పవృక్షమూలతలే   || 58  ||

కవిమల్లసూక్తిలహరీస్తన్వానా శారదా జయతి |

విధికేలిసదనహంసీ కల్యాణైకస్థలీ నమతాం   || 59  ||

స్ఫురతు మమ వచసి వాణి త్వదీయవైభవసుధాధారా |

నిత్యం వ్యక్తిం ప్రాప్తా ధుతనతజనఖేదజాలకా మహతీ   || 60  ||

వాణి తవ స్తుతివిషయే బుద్ధిర్జాతా హి మే సహసా |

తేన మమ భాగదేయం పరిణతిమిత్యేవ నిత్యసంతుష్టః   || 61  ||

సృష్టికలామండనభూరేషా వాణీ జగజ్జననీ |

ఆలోకమాత్రవశతస్తమసో హంత్రీ చ సంపదాం జననీ   || 62  ||

పౌరుషలోపవిధాత్రీ ధాతురియం కమలకోమలాంగలతా |

వసతు సదా జిహ్వాగ్రే దివ్యజ్ఞానప్రదా దేవీ   || 63  ||

ప్రతిదినదురితనిహంత్రీ పద్మాసననయనపుణ్యపరిపాకః |

కవితాసంతానకలాబీజంకురవర్ధినీ జయతి   || 64  ||

క్షణవీక్షణేన మాతా లక్ష్మీం పక్ష్మలయతి ప్రణతే |

వేధసి సురతమహోత్సవసంకేతతలప్రదర్శినీ కాలే   || 65  ||

శృంగారవిభ్రమవతా నీలోత్పలకాంతిచాతురీసుపుషా |

వాణీనేత్రేణ విధిర్జితోఽభవత్ సోఽపి సతతకృతవేదః   || 66  ||

శ్యామా కటాక్షలహరీ మాతుర్జయతీహ సంపదాం జననీ |

యామస్తౌషీత్ కాలే మఘవా నాకాధిపా మునయః   || 67  ||

మణికటకనాదపూరితమంబాపాదాంబుజం మహామంత్రైః |

జప్యం ధ్యేయం కాలే దిశి దిశి కలితస్వరక్షం చ   || 68  ||

స్మరణేన దురితహంత్రీ నమనేన కవిత్వసిద్ధిదా వాణీ |

కుసుమసమర్పణకలయా కాలే మోక్షప్రదాత్రీ చ   || 69  ||

విసృమరతమోనిహంత్రి త్వాం సేవే శారదాదేవి |

శిశిరీకురు మాం కాలే కరుణారసవీక్షితేన వరదేన   || 70  ||

మాతర్నమోఽస్తు తావకకటాక్షమధుపాయ శారదే జయతి |

యో వేధసోఽపి కాలే సృష్ట్యాదౌ చాతురీం దిత్సన్   || 71  ||

సుమనోవాంఛాదానే కృతావధానం ధనం ధాతుః |

ధిషణాజాడ్యాదిహరం యద్వీక్షణమామనంతి జగతి బుధాః   || 72  ||

లలితగమనం త్వదీయం కలనూపురనాదపూరితం వాణి |

నౌమి పదాంబుజయుగలం కవితాసిద్ధ్యై విధేః కాంతే   || 73  ||

కమలకృతవైజయంతీ విధేర్ముఖేష్వాదరాద్వాణ్యాః |

జయతి కటాక్షలహరీ తోరణలక్ష్మీస్తు సత్యలోకే హి   || 74  ||

నిశ్రేణికా చ ముక్తేః సజ్జ్ఞాననదీమహాలహరీ |

నానారసచాతుర్యప్రసారికా దురితశంకులా కాలే   || 75  ||

పరతంత్రితవిధివిభవా దేవీ సా శారదా జయతి |

కైవల్యాదికలానాం దాత్రీ భక్తాలికామధేనుర్యా   || 76  ||

కవికామధేనురేషా మంజుస్మేరాననాంభోజా |

వాణీ జయతి విధాతుర్మననాగమసంప్రదాయఫలదా హి   || 77  ||

ఘనతరకృపారసార్ద్రైర్నానావిభవప్రదానకృతదీక్షైః |

వాణీ జయతి కటాక్షైర్నః కాశ్మల్యం హఠాన్నిరస్యంతీ   || 78  ||

దాసాశాదానకలాప్రక్లృప్తదీక్షాకటాక్షలహరీ మే |

కబలయతు పాపరాశిం వాణ్యా నిత్యం మహౌదార్యా   || 79  ||

ఆదిమజననీ సైషా వాణీ జయతీహ భక్తరక్షాయై |

సర్వత్ర కలితదేహా నానాశాస్త్రాదిరూపతో జగతి   || 80  ||

బహువిధలీలాసదనం సంభృతఫుల్లాబ్జశిల్పవైచిత్ర్యం |

వాణీముఖారవిందం చుంబతి మానసమిదం హఠాత్ కృత్యం   || 81  ||

సౌభాగ్యకాంతిసారం వదనాంభోజం శ్రియై వాణ్యాః |

ఆశ్రిత్య సకలవేదా అపి నిత్యం మాన్యతాం ప్రాప్తాః   || 82  ||

జ్ఞానమయీ సలిలమయీ తత్త్వమయీ భాతి సర్వలోకానాం |

అక్షరమయీ చ వాణీ శ్రేయోదానే నిబద్ధచిత్తగతిః   || 83  ||

నమౌక్తిరస్తు మాత్రే వాణ్యైః నః సిద్ధిదా భక్త్యా |

ఆనందిన్యై జ్ఞానస్వరూపభాజే ప్రబంధరూపాయై   || 84  ||

ఆరాధ్యాయై ధ్యేయాయై చాత్తకలాచిత్రనాదరూపాయై |

సచ్చిత్తవాసభాజే వాణ్యై భూయో నమోఽస్తు భక్తికృతం   || 85  ||

కమలాసనపుణ్యకలా నమతాం చింతామణిర్వాణీ |

జీవాక్షరబోధకలారూపా జయతీహ సత్త్వరూపవతీ   || 86  ||

బ్రహ్మాండమండలమిదం వ్యాప్తం మాత్రా క్షరాక్షరాదిజుషా |

యత్పదకమలం నిత్యం శ్రుతితతిసుదతీవిభూషణం చ విదుః   || 87  ||

మనసిజసామ్రాజ్యకలాలక్ష్మీరేషా విరించిముఖహర్షం |

వ్యాతన్వానా నిత్యం రాజతి షడరస్వరూపచక్రతలే   || 88  ||

మంజులవీణానినదప్రయోగనిర్ధూతమోహసంచారా |

హంసీయానా వాణీ హంసగతిః సుకృతినేత్రపుణ్యకలా   || 89  ||

కుచకలశసవిధవినిహితవీణానిక్కాణసావధానకలా |

అధినేత్రీ హి కలానాం సకలానాం శారదా జయతి   || 90  ||

త్రిదశపరిషన్నిషేవ్యా ప్రాతః సాయం ప్రఫుల్లముఖకమలా |

కమలాస్నుషా హి వాణీ వాణీం దిశతు ప్రబంధరసభరితాం   || 91  ||

అధికచపలైః కటాక్షైరంచితలీలారసైరుదారైర్నః |

మంగలమాతన్వానా విధాతృగృహిణీ సురాదినుతపాదా   || 92  ||

కాంతం లక్ష్మీభవనం ముఖకమలం శారదాదేవ్యాః |

సౌభాగ్యకాంతిసారం స్పృహయతి మే మానసం సరసం   || 93  ||

కారుణ్యపూర్ణనయనం పుస్తకహస్తం మహః కిమపి |

ధాతుః పుణ్యకలానాం పరిపాకో మర్త్యరక్షణం కురుతే   || 94  ||

సంసారవారిరాశిం తర్తుం సా సేతురేషా నః |

ధాతుర్గృహిణీ దుఃఖం శిథిలయతు పరం జనిప్రాప్తం   || 95  ||

సరసకవికల్పవల్లీమంబాం వాణీమహముపాసే |

అంతస్తమోనిహంత్రీం యామాహుర్జ్ఞానదాం మునయః   || 96  ||

మమ లోచనయోర్భూయాత్ విద్యా కాపి ప్రధూతజనిభీతిః |

నిగమేషు సంచరంతీ కృపానిధిః శారదా దేవీ   || 97  ||

శమితనతదురితసంఘా ధాత్రే నిజనేత్రకల్పితానంగా |

కృతసురశాత్రవభంగా సా దేవీ మంగలైస్తుంగా   || 98  ||

పద్మాసనస్థితాం తాం వాణీం చతురాననాం వందే |

కల్యాణానాం సరణిం కవిపరిషత్కల్పవల్లరీం మాన్యాం   || 99  ||

కుచభారసంనతాంగీం కుందస్మేరాననాంభోజాం |

కుందలకుసుమపరిమలసంపాదితభృంగఝంకృతితరంగాం   || 100  ||

చిద్రూపాం విధిమహిషీం హంసగతిం హంససంనుతచరిత్రాం |

విద్యాకలాదినిలయామారాధ్యాం సకలజడిమదోషహరీం   || 101  ||

జనని యది భజతి లోకే తవ లోచనవీక్షణం క్షణం మర్త్యః |

కుపురుషనుతివిముఖస్తే రూపం జ్ఞానప్రదం పశ్యన్   || 102  ||

కుక్షింభరిత్వముఖదుర్గుణాదికం దూరతస్త్యక్త్వా |

త్వద్భావనేన ధన్యో నయతి చ కాలం ప్రమోదేన   || 103  ||

మయి తాపభారశాంత్యై తరంగయ త్వదిలోచనే మాతః |

యచ్ఛారదాబ్జసుషమామాన్యే దేవాదిభిః ప్రార్థ్యే   || 104  ||

సర్వార్థదా హి భజతాం కటాక్షధాటీ శివంకరీ వాణి |

చింతామణిమివ కలయతి యాం హి విధిర్విదితమంత్రోఽపి   || 105  ||

సుకృతపరిపాకమానసా ధన్యాస్త్వామర్చయంతి నను వాణి |

అహమపి తద్వత్కలయే ఫలప్రదా త్వం సమానకల్పాసి   || 106  ||

నిగమవచసాం నిదానం తవ పాదాబ్జం వతంసయతు కాలే |

దేవోఽపి దేవదేవో విజితజగత్త్రయతలే మాతః   || 107  ||

అంతస్తమసో హంత్రీ పటీయసీ తే కటాక్షఝరమాలా |

యా తోరణమాల్యశ్రియమాతనుతే వేధసః సౌధే   || 108  ||

శృంగారవిభ్రమవతీం త్వాం ప్రాప్యైవ క్రియాకాలే |

కలయతి సృష్ట్యాదిమసౌ విధిః శ్రుతివ్యక్తమాహాత్మ్యః   || 109  ||

వేధోవదనం కేలీవనమాసాద్యాంబ పరమయా హి ముదా |

క్రీడసి శుకీవ కాలే ద్విజసంఘసమర్చితాత్మవృత్తిశ్చ   || 110  ||

ధాతుర్ముఖమంజూషారత్నం నిగమాంతకేలివనహంసీం |

పరమాం కలాముపాసే తామంబాం చిద్విలాసఘనవృత్తిం   || 111  ||

వాగీశదేవరూపిణి గీష్పతిముఖదేవసంఘనుతచరణే |

తవ రూపం సూర్యాయుతదృశ్యం దర్శయ మమ జ్ఞానే   || 112  ||

దివ్యజ్ఞానప్రదమిదమంబ త్వద్రూపమాదరాద్వాణి |

కాలే దర్శయ కృపయా తేన వయం ప్రాప్తకార్యసాఫల్యాః   || 113  ||

అంబా త్రిసంధ్యపఠనప్రవృత్తిభాజాం క్రమేణ నామ్నాం తు |

ద్వాదశకలావిభేదవ్యూహాదిజ్ఞానదా ప్రసన్నా హి   || 114  ||

మూకోఽపి సత్కవిః స్యాద్ దురక్షరాణ్యపి విధాతృలిఖితాని |

సత్ఫలదాని సరస్వతి కటాక్షపూరే యది కాపి   || 115  ||

అవలంబే తామంబాం పంచాశద్వర్ణకల్పితజగత్కాం |

సృష్టిస్థితిసంహారస్థిరోదయాం వివిధశాస్త్రరూపాఢ్యాం   || 116  ||

వాణీం దిశతు మనోజ్ఞాం వాణీ గతిహసితకాదంబా |

యా దంభాదివిముక్తా నాదం భావ్యం వదంతి యద్రూపం   || 117  ||

రాకేందువదనబింబా సాంబా వాణీ పునాతు కృతిమేనాం |

పరికలితభావబంధాం రసోజ్జ్వలాం మంగలోత్తుంగాం   || 118  ||

లావణ్యకాంతిసింధుః పాదాబ్జనతప్రభావసంధాత్రీ |

ప్రసృమరతమోనిహంత్రీ మద్వాచాం దేవతా చాద్యా   || 119  ||

జనతానేత్రానందం రూపం యస్యాః స్ఫుటం భాతి |

స్మరణం త్వజ్ఞానహరం విశ్వజ్ఞానప్రదం చ సా జయతి   || 120  ||

సహధర్మిణీ విధాతుర్దారిద్ర్యధ్వంసినీ నిజకటాక్షైః |

సాంనిధ్యం జనయతు మే సురమునినరసంనుతస్వమహిమేయం   || 121  ||

ముఖరితవీణా వాణీ వాణీం మే దిశతు నైజనుతియోగ్యాం |

ఆస్వాదితశాస్త్రామృతలహరీం సద్యస్తమోనిహంత్రీం చ   || 122  ||

మణినూపురనాదనిభా వాణీ భాతి త్వదీయభక్తముఖే |

కీర్తిర్దిశాసు శుద్ధిర్వపుషి బహుముఖీ పరం కాలే   || 123  ||

తవ పాదస్మరణవశాత్ తామ్యతి తిమిరావలిశ్చాంతః |

ఆనందలహరివీచీ ప్రసర్పతి క్షమాతలే హి భక్తానాం   || 124  ||

సంపన్నలినీభానుం జ్ఞానాబ్ధిసుధాకరం హి తవ రూపం |

భక్త్యా మనసి గృణంతో గచ్ఛంతి వ్యోమయానమారూఢాః   || 125  ||

హృత్తమసాం దీపరుచిర్విధాతృదయితా మమాస్తు పరదైవం |

భవతాపమేఘమాలా కవిశుకవాసంతికశ్రీర్హి   || 126  ||

మమ మానసమణిహర్మ్యే విహరతు వాణ్యాః స్వరూపం తు |

నిగమవచసాం నిగుంఫైర్వేద్యం తద్వేధసా లాల్యం   || 127  ||

సతతమభిగమ్యరూపా విబుధవరేడ్యా సరస్వతీ మాతా |

మనసి మమ సంనిధత్తాం భూత్యై నః సర్వతః కాలే   || 128  ||

మమ శిరసి నీచపుణ్యే పుణ్యఘనా వేదమౌలిహర్మ్యా చ |

కృతపదవిన్యాసభరా వాణీ జయతీహ శతమఖాదినుతా   || 129  ||

మాయానిరసనదక్షా మాతేయం సుప్రసన్నా మే |

లభతే పరమం జ్ఞానం యద్భక్త్యా పామరోఽపి చ ధరిత్ర్యాం   || 130  ||

వాణీశ్వరి తవ రూపం నామస్మరణం చ పూజనం భక్త్యా |

సిధ్యతి సకలవిభూత్యై తత్ర హి భవతీదయాప్రసారస్తు   || 131  ||

సఫలయతు నేత్రయుగలం హతనతదురితా చ సా పరా దేవీ |

కమలజమాన్యచరిత్రా సుమనోవాంఛాప్రదానకృతదీక్షా   || 132  ||

పంకజమృణాలతంతుప్రతిభటరూపం క్వచిద్దృశ్యం |

కవికులవాణీకైరవశారదచంద్రప్రభాకబలితం చ   || 133  ||

నలినభవగృహిణి వాణి ప్రహ్వానాం సపది భక్తానాం |

లుంపసి మోహం భవతీస్మరణాద్వరివస్యయా స్తుత్యా   || 134  ||

కవికులకల్పకవల్లీమపాంగలీలాకృతార్తిశమనాం తాం |

వాణీమన్వహమార్యారాధ్యాం మోక్షాయ నిభృతమహమీడే   || 135  ||

సంవిత్సుఖస్వరూపామంబాం వాణీమహర్నిశం మనసి |

కలయే కలితాప్రభరప్రశాంతికామః ప్రభావతీం జయదాం   || 136  ||

నతపరిపాలిని వాణి త్రిజగదఘధ్వంసిని శ్రితానాం నః |

తవ పాదయుగం నిగలం భవతు తమోరాశిదుష్టహస్తిగణే   || 137  ||

కామాదిదుర్గ్రహకృతానర్థనిరాసాయ తావకాపాంగాః |

వాణి జనయంతి నతానాం కైవల్య ఖప్రదానాయ   || 138  ||

తవ దర్శనం హి మాతః పరమం సంస్కారమాత్తపాపానాం |

కల్యాణసూక్తికందలరసప్రదం మాన్యతే విబుధైః   || 139  ||

ధాతుర్వదనసరోజే శ్రుతిసీమని హృది చ భక్తానాం |

ఏకపదా ద్విపదా వా రాజతి వాణీ జగన్మాతా   || 140  ||

మణిమయకాంచీలసితా వీణాపుస్తకకరారవిందా చ |

నమతాం జాడ్యవిధూననధృతదీక్షా రాజతే వాణీ   || 141  ||

కబలయతు తాపమస్యాః స్మరణం పాదాబ్జవందనం వాణ్యాః |

ధాతుర్జిహ్వాగ్రతలే నృత్యంత్యాః సారసూక్తిరసయంత్యాః   || 142  ||

పద్మజవదనవిభూషా నిగమశిఖోత్తంసపీఠికా వాణీ |

సకలవిధశాస్త్రరూపా భక్తానాం సత్కవిత్వదానప్రా   || 143   |||

గతిజితమరాలగమనా మరాలవాహా చ వేధసో దారాః |

శిశిరదయాసారా సా నమతాం సంతాపహారిణీ సహసా   || 144  ||

స్తనభారసంనతాంగీ దరదలితాంభోజలోచనాంతశ్రీః |

సవిధతలే విబుధవధూపరిచరణాద్యైశ్చ తుష్టచిత్తా సా   || 145  ||

హరిణాంకవదనబింబా పృథులనితంబా కచాత్తలోలంబా |

నిజగతిజితకాదంబా సాంబా పదపద్మనమ్రభక్తకదంబా   || 146  ||

పరిహసితనీలనీరజదేహశ్రీః శారదా ప్రథమా |

స్ఫటికమణిభరకాంతిః సరస్వతీ కీర్త్యతే చ విబుధగణైః   || 147  ||

నాథే దృఢభక్తిమతీ సృష్ట్యాదౌ చిత్స్వరూపా చ |

ధాత్రా సమానభావా చైకాసనపూండరీకమధ్యస్థా   || 148  ||

ప్రీత్యా సరసపుమర్థాన్ దదాతి కాలే చిదాదిసంధాత్రీ |

సా మే దైవతమేషా సతతనిషేవ్యా చ కామదా భూయాత్   || 149  ||

హరిచరణనలినయుగలే సదైకతానా హి శారదా జననీ |

పద్మానీలాదిసఖీ శ్రుత్యుద్యానే విహారరసభరితా   || 150  ||

ధాతుః కుటుంబినీయం తన్యాత్ కల్యాణసంతతిం సతతం |

యా తారుణ్యవిభుషా సమక్రమా త్రిపురసుందర్యా   || 151  ||

నానాక్షరాదిమాతృకగణేడితా శబ్దరూపా చ |

నాదబ్రహ్మవిలాసా వాణీ సా మంగలాని నస్తన్యాత్   || 152  ||

దృక్కోణవీక్షణకలానిగమప్రాభవవిధానదా నమతాం |

విబుధానాం హృదయాబ్జం యస్యా వాసస్థలీ చ నిర్దిష్టం   || 153  ||

మోహాదివనకుఠారా యా నిత్యం సేవ్యతే త్రిదశసంధైః |

నిత్యప్రసన్నరూపాం శాంతాం యామేవ సేవతే వేధాః   || 154  ||

నమతాం యయైవ ఖండీక్రియతే సువర్ణదృష్టిపుషా |

యద్వీక్షణేన పురుషః ఖ్యాతో నృపసదసి మాన్యతే ప్రథమం   || 155  ||

యస్యై శ్రోత్రియవర్యైస్త్రిసంధ్యమధార్దికం క్రియతే |

సా మంజునీతిరూపా వాణీరూపా చ భణ్యతే నిపుణైః   || 156  ||

సా మయి తన్యాదీక్షాం వీక్షావనదాం సరస్వతీ దేవీ |

సంతానకుసుమజైత్రీం యామైచ్ఛత్ ప్రాప్తుమంజసా వేధాః   || 157  ||

మందస్మితమధురాస్యం కృపావలోకం నిరస్తజాద్యతతి |

భూయాద్ వాణ్యా రూపం పురః కరాంభోజకలితవీణాది   || 158  ||

వాణ్యాః పరం న జానే దైవతమన్యద్ వనే గిరౌ చ పథి |

గగనే వా సంరక్షితనతజనతాయాః కృపారసార్ద్రాయాః   || 159  ||

ఆస్యేందోరవలోకనమంబాయాః పాదపద్మసేవా చ |

సర్వశ్రేయఃప్రాప్త్యై శాస్త్రజ్ఞైః సుష్ఠు నిర్దిష్టా   || 160  ||

వాణీ హి తాపహంత్రీ జగతాం కారుణ్యపూర్ణనయనశ్రీః |

మందాన్ కరోతి విబుధాన్ ద్రావయతి శిలాస్తతస్తు కిం చిత్రం   || 161  ||

యస్మిన్ కటాక్షపూరో న భవతి స హి దీనవదనః సన్ |

ప్రస్ఖలితవాగ్భార్తో భిక్షామటతీహ నిందితో బహుశః   || 162  ||

వాణ్యాః కటాక్షపూరస్రజా త్వలంకృతనిగాలో యః |

స హి భవతి రాజమాన్యః కాంతాధరమధురవాగ్విలాసశ్చ   || 163  ||

కవితాభాగ్యవిధాత్రీ పరిమలసంక్రాంతమధుపగణకేశా |

మమ నయనయోః కదా వా సా దేవీ కలితసంనిధానకలా   || 164  ||

పరచిద్విధానరూపా వాణీ శ్రుతిసీమ్ని రాజతే పరమా |

మునిజనమానసహంసీ యా విహరతి సా శుభాయ స్యాత్   || 165  ||

జపమాలికయా వాణీకరధృతయా వీణయా చ కోశేన |

అహమస్మి నాథవానిహ కిం వాశాస్యం పరం లోకే   || 166  ||

కైవల్యానందసుఖప్రాప్త్యై తేజస్తు మన్మహే కిమపి |

యద్ వాంఛితచింతామణిరితి వాణీతి చ భువి ఖ్యాతం   || 167  ||

కవికులసూక్తిశ్రేణీశ్రవణానందోల్లసద్వతంససుమా |

సా దేవీ మమ హృదయే కృతసాంనిధ్యా కృతత్రాణా   || 168  ||

యస్యా దృష్టివిదూరాః కుమతాః శ్రుత్యర్థవంచకాః శప్తాః |

క్రందంతి దిగంతతటే మోహాద్యైర్లుప్తనయనాశ్చ   || 169  ||

సత్పరిషత్సంమాన్యా శ్రుతిజీవనదాయినీ జగన్మాతా |

చతురాననభాగ్యకలా కృతసాంనిధ్యా హి రాజతే హృదయే   || 170  ||

కృతసుకృతైః సందృశ్యా మందస్మితమధురవదనపద్మశ్రీః |

మునినారదాదిపరిషత్తత్త్వోపక్రమవిచక్షణా వాణీ   || 171  ||

కవివాగ్వాసంతీనాం వసంతలక్ష్మీర్విధాతృదయితా నః |

పరమాం ముదం విధత్తే కాలే కాలే మహాభూత్యై   || 172  ||

కవితారసపరిమలితం కరోతి వదనం నతానాం యా |

స్తోతుం తాం మే హ్యారాత్ సా దేవీ సుప్రసన్నాస్తు   || 173  ||

యస్యాః ప్రసాదభూమ్నా నాకిగణాః సత్త్వసంపన్నాః |

ఐంద్రీం శ్రియమపి మాన్యాం పశ్యంతి క్షపితశత్రుభయపీడాం   || 174  ||

మాన్యం విధాతృలోకే తత్తేజో భాతి సర్వసురవంద్యం |

బ్రహ్మాండమండలమిదం యద్రూపం యత్ర చాక్షరగతిశ్చ   || 175  ||

జనని తరంగయ నయనే మయి దీనే తే దయాస్నిగ్ధే |

తేన వయం కృతార్థా నాతః పరమస్తిః నః ప్రార్థ్యం   || 176  ||

వాణి విధాతుః కాంతే స్తోతుం త్వామాదరేణ కిం వాచ్యం |

భాసి త్వమేవ పరమం దైవతమిత్యేవ జానామి   || 177  ||

కబలితతమోవిలాసం తేజస్తన్మన్మహే మహోదారం |

ఫలితసుమనోఽభిలాషం వాణీరూపం విపంచికోల్లసితం   || 178  ||

పద్మసనసుకృతకలాపరిపాకోదయమపాస్తనతదోషం |

సరసజ్ఞానకవిత్వాద్యనంతసుకృతం విరాజతే తేజః   || 179  ||

నిజనాథవదనసింహాసనమారూఢాముపాస్మహే వాణీం |

యా కృత్రిమవాగ్గుంఫైర్విరచితకేలిర్ధినోతి విధిమాద్యం   || 180  ||

సుజనానందకరీ సా జనయంతీ సర్వసంపదం ధాతుః |

భక్తేషు తాం నయంతీమన్వహమహమాద్రియే గిరాం దేవీం   || 181  ||

కరుణాకటాక్షలహరీ కామాయాస్తు ప్రకామకృతరక్షా |

వాణ్యా విధాతృమాన్యా సత్సుఖదానే దిశి ఖ్యాతా   || 182  ||

విసరో మహోత్సవానాం విరించినయనావలేరియం మాతా |

ప్రియకార్యసిద్ధిదాత్రీ జగతీరక్షాధురంధరా జయతి   || 183  ||

విబుధాభిగమ్యరూపా హంసావలిసేవితా గిరాం దేవీ |

గంగేవ కనతి కాలే పరికంపితశివజటాకోటిః   || 184  ||

నౌకాం భవాంబురాశేరజ్ఞానధ్వాంతచంద్రికాం వాణీం |

కలయే మనసి సదాహం శ్రుతిపంజరశారికాం దేవీం   || 185  ||

భవతాపారణ్యతలే జహ్నుసుతా శారదా దేవీ |

జ్ఞానానందమయీ నః సంపత్సిద్ధ్యై ప్రతిక్షణం జయతు   || 186  ||

మత్తగజమాన్యగమనా మధురాలాపా చ మాన్యచరితా సా |

మందస్మేరముఖాబ్జా వాణీ మమ హృదయసారసే లసతు   || 187  ||

రక్షణచణౌ చ వాణ్యాః పాదౌ వందే మనోజ్ఞమణినాదౌ |

యత్సేవనేన ధన్యాః పురుహూతాద్యా దిశాం నాథాః   || 188  ||

ధాతుర్ధైర్యకృపాణీ వాణీ సురవృక్షకుసుమమృదువేణీ |

శుకవాణీ నుతవాణీ కవికులమోదాయ జయతి మృదువాణీ   || 189  ||

కల్యాణైకనికేతనమస్యా రూపం సదా స్ఫురతు చిత్తే |

మానసకాలుష్యహరం మధుమథనశివాదిబహుమతోత్కర్షం   || 190  ||

మునిజనమానసరత్నం చిరత్నమేతద్విధాతృసుకృతకలా |

వినతజనలోచనశ్రీకర్పూరకలా పరా జయతి   || 191  ||

ధృతసుమమధుపక్రీడాస్థానాయితకేశభారాయై |

నమ ఉక్తిరస్తు మాత్రే వాగ్జితపీయూషధారాయై   || 192  ||

బాలకురంగవిలోచనధాటీరక్షితసురాదిమనుజానాం |

నయనయుగాసేవ్యం తద్భాతీహ ధరాతలే తేజః   || 193  ||

కుశలవిధయే తదస్తు శ్రుతిపాఠరతాదృతాత్మబహుకేలిః |

కబలితపదనతదైన్యం తరుణాంబుజలోచనం తేజః   || 194  ||

బాలమరాలీగత్యై సురగిరికన్యాదిమహితకలగీత్యై |

విరచితనానానీత్యై చేతో మే స్పృహయతే బహులకీర్త్యై   || 195  ||

వినమదమరేశసుదతీకచసుమమకరందధారయా స్నిగ్ధం |

తవ పాదపద్మమేతత్ కదా ను మమ మూర్ధ్ని భూషణం జనని   || 196  ||

కమలజపరతంత్రం తద్గతతంద్రం వస్తు నిస్తులముపాసే |

తేనైవాహం ధన్యో మద్వంశ్యా నిరసితాత్మతాపభరాః   || 197  ||

జ్ఞానామృతసంధాత్రీ భవాబ్ధిసంతరణపోత్రనామాదిః |

వాణీ వాచాం లహరీమవంధ్యయంతీ సురాదినుతచరితా   || 198  ||

కారుణ్యపూర్ణమేతద్ వాణీరూపం సదా కలయే |

యద్భజనాద్ దేవానామపి సంవిద్ భాతి కార్యకాలేషు   || 199  ||

ధీపద్మపీఠమాస్తే సా వాణీ కాంక్షితాని కలయంతీ |

యా ఘనకృపాస్వరూపా సంకీర్త్యా సర్వదేవనుతా   || 200  ||

తవ పాదపద్మవిసృమరకాంతిఝరీం మనసి కలయంస్తు |

నిరసితనరకాదిభయో విరాజతే నాకిసదసి సురమాన్యః   || 201  ||

కుచయుగలనమ్రగాత్రం పవిత్రమేతద్ భజే తేజః |

ధాతురపి సర్వదేవైర్యన్నిర్దిష్టం హు భద్రాయ   || 202  ||

కృతనతపదవాగ్ధాటీ చేటీభూతామరేశమహిషీ నః |

కటికృతమనోజ్ఞశాటీ పాటీరరసార్ద్రనైజతనుకోటీ   || 203  ||

పద్మభవపుణ్యకోటీ హర్షితకవివృందసూక్తిరసధాటీ |

ముఖలసితసరసవాటీ విలసతు మమ మానసే కృపాకోటీ   || 204  ||

జ్ఞానపరాక్రమకలికా దిశి దిశి కిన్నరసుగీతనిజయశసః |

ధన్యా భాంతి హి మనుజాః యద్వీక్షాలవవిశేషతః కాలే   || 205  ||

సురజనపాలనదక్షా ప్రశాంతవీక్షా నిరస్తరిపుపక్షా |

మోక్షార్థిభిః శ్రితా సా లాక్షారసలసితపాదభాగ్ భాతి   || 206  ||

కుంకుమభరరుచిరాంగీ భాతి కృశాంగీ గిరాం దేవీ |

ధాతురపి జ్ఞానప్రదమస్యా రూపం వదంతి విబుధేశాః   || 207  ||

వాణి నతిమంబ నిత్యం కరవాణి హి చిత్సుఖావాప్త్యై |

తాదృక్త్వదీయకరుణావీక్షణతో గీష్పతిశ్చ సురమాన్యః   || 208  ||

కల్యామి నతిమనంతాం కాలే కాలే శుభప్రాప్త్యై |

ధాతుః సుకృతోల్లాసం కరధృతవీణాదికం చ యద్రూపం   || 209  ||

కమలాసనదయితా సా లసతు పురోఽస్మాకమాదరకృతశ్రీః |

యత్ప్రణమనాజ్జనానాం కవితోన్మేషః సదీడితో భవతి   || 210  ||

పరసంవిదాత్మికా సా మహిషీ ధాతుః కలావతీ వాణీ |

శిశిరీకరోతి తప్తాన్ కరుణారసదిగ్ధనేత్రపాల్యా నః   || 211  ||

ధాతృమనోరథపాత్రం సంతప్తస్వర్ణకామ్యనిజగాత్రం |

ఆశ్రితకమలజగోత్రం రక్షితనతబాహుచ్ఛాత్రం   || 212  ||

కవికులజిహ్వాలోలం పితామహాదృతమనోజ్ఞనిజలీలం |

నిరసితనతదుష్కాలం వందే తేజః సదాలినుతశీలం   || 213  ||

మందానామపి మంజులకవిత్వరసదాయినీ జననీ |

కాపి కరుణామయీ సా లసతు పురస్తాత్ సదాస్మాకం   || 214  ||

నిస్తులపదసంప్రాప్త్యై భూయో భూయో నమాంసి తే వాణి |

దీపకలామయి చాంతఃస్మరణం ధాతుః కుటుంబిన్యై   || 215  ||

మాయానిరాసకామో వందే వాణ్యాః పదాంభోజం |

సిద్ధమనోరథశతకా యద్భజనేనార్థినః కాలే   || 216  ||

సతతం బద్ధాంజలిపుటుముపాస్మహే తచ్ఛుభప్రదం తేజః |

యత్కమలజనయనానాం ప్రమోదపీయూషలహరికామోదం   || 217  ||

దివి వా భువి దిక్షు జలే వహ్నౌ వా సర్వతో వాణి |

జంతూనాం కిల రక్షా త్వధీనా కీర్త్యతే విబుధైః   || 218  ||

భారతి భవతాపార్తాన్ పాహి కటాక్షాంకురైః శీతైః |

పరమనందవిధాతృన్ యానేవ స్తౌతి పద్మవాసోఽపి   || 219  ||

కులదైవతమస్మాకం తత్తేజః కుటిలకుంతలం కిమపి |

కరధృతపుస్తకవీణం కలయే కామాగమోదయం ధాతుః   || 220  ||

పరమానందధనం తద్ధాతురపి బ్రహ్మతత్త్వరసదాయి |

ఆబ్రహ్మకీటనృత్యత్స్వవైభవం జయతి శారదారూపం   || 221  ||

విబుధజనమోదజననీ జననీ నః సా విధేః పత్నీ |

మృదుసంచారవిలాసైః శుభంకరీ భవతు సంతతం కాలే   || 222  ||

సరసమనోజ్ఞవిలాసైః స్వవశే కృత్వా మనో విధేర్వాణీ |

సృష్ట్యాదౌ శుభలేఖాకరీ నృణాం మస్తకే మాతా   || 223  ||

ప్రకృతిమృదులం పదాబ్జం వాణీదేవ్యా మదీయచిత్తతటే |

కామాదిసూచినిచితే కథం స్థితిం ప్రాప్నుయాత్ కాలే   || 224  ||

నిఖిలచరాచరరక్షాం వితన్వతీ పద్మజప్రియా దేవీ |

మమ కులదైవతమేషా జయతి సదారాధ్యమాన్యపదకమలా   || 225  ||

కుశలసమృద్ధ్యై భూయాదంబా సా శారదా దేవీ |

జనిరక్షణాదిలీలావిహారభాఙ్నిగమసౌధదీపకలా   || 226  ||

వాచాలయతి కటాక్షైర్జడం శిలామల్పజంతుం  వా |

యా వాణీ సా శరణం భవే భవే ప్రార్థ్యే శ్రియఃప్రాప్త్యై   || 227  ||

యది హి ప్రసాదభూమా వాణ్యాస్తత్రైవ సా హరేః కాంతా |

పరిలసిత నిత్యవాసరతా   || 228  ||

సనకసనందనవంద్యే కాంతే పరమేష్టినః శ్రియఃప్రాప్త్యై |

వాణి త్వాం నౌమి సదా భవ ప్రసన్నా విప`న్చిలసితకరే   || 229  ||

వాణి విపంచీకలరవరసికే గంధర్వయోషిదభివంద్యే |

తవ చరణం మమ శరణం భవవారిధిసుతేమంబ కలయామి   || 230  ||

వాణి కదాహం లప్స్యే చరణాంభోజం త్వదీయమిదమారాత్ |

నిజమణినూపురనాదస్పృహణీయవచఃపదం కలితభక్తేః   || 231  ||

శ్రుతిపూతముఖమనోహరలావణ్యకుసుమమృదుశరీరేయం |

నిజకరుణాపాంగసుధాపూరణకృతవైభవా భాతి   || 232  ||

పరిసరనతవిబుధాలీకిరీటమణికాంతివల్లరీవిసరైః |

కృతనీరాజనవిధి తే మమ తు శిరోభూషణం హి పదయుగలం   || 233  ||

ప్రేమవతీ విధిభవనే హంసగతిర్హంసయానకృతచారా |

వాచామకృత్రిమానాం స్థైర్యవిధాత్రీ మహేశానీ   || 234  ||

ఆనందరూపకోటీమంబాం తాం సంతతం కలయే |

సంవిద్రూపా యా కిల విధాతృగేహే శ్రుతిశ్రియం ధత్తే   || 235  ||

కమలజనేత్రమహోత్సవతారుణ్యశ్రీర్నిరస్తనతశత్రుః |

లలితలికుచాభకుచభరయుగలా దృగ్విజితహరిణసందోహా   || 236  ||

కారుణ్యపూర్ణనయనా కలికల్మషనాశినీ చ సా వాణీ |

ముఖజితశారదకమలా వక్త్రాంభోజే సదా స్ఫురతు మాతా   || 237  ||

కమలసుషమానివాసస్థానకటాక్షం చిరాయ కృతరక్షం |

రక్షోగణభీతికరం తేజో భాతి ప్రకామమిహ మనసి   || 238  ||

కమలజతపఃఫలం తన్మునిజనహృదయాబ్జనిత్యకృతనృత్తం |

కరుణాలోలాపాంగం తత్తేజో భాతు మమ ముఖాంభోజే   || 239  ||

భాగ్యం విధినయనానాం సంసృతితాపజ్వరాదితప్తానాం |

భేషజమేతద్రూపం కలాగ్రహం మన్యతే దేవ్యాః   || 240  ||

జనని కదా వా నేష్యామ్యహమారాదర్చితత్వదీయపదః |

నిమిషమివ హంత దివసాన్ దృష్ట్వా త్వామాదరేణ కల్యాణీం   || 241  ||

మంజులకవితాసంతతిబీజాంకురదాయిసారసాలోకా |

జనని తవాపాంగశ్రీర్జయతి జగత్త్రాణకలితదీక్షేయం   || 242  ||

అంబ తవాపాంగశ్రీరపాంగకేలీశతాని జనయంతీ |

ధాతుర్హృదయే జయతి వ్రీడామదమోదకామసారకరీ   || 243  ||

సర్వజగన్నుతవిభవే సంతతమపి వాంఛితప్రదే మాతః |

అధునా త్వమేవ శరణం తేనాహం ప్రాప్తజన్మసాఫల్యః   || 244  ||

శాంతిరససర్వశేవధిమంబాం సేవే మనోరథావాప్త్యై |

యామారాధ్య సురేశాః స్వపదం ప్రాపుర్హి తద్రక్షం   || 245  ||

కులజా భార్యా కీర్తిర్దానం పుత్రాదయో యే చ |

సిధ్యంతి తే హి సర్వే యస్మై వాణీ ప్రసన్నా సా   || 246  ||

కా క్షతిరంబ కటాక్షే న్యస్తే సతి మయి విరించివరపత్ని |

గంగాశునకన్యాయాన్మహతీ మమ వృద్ధిరీరితా నిపుణైః   || 247  ||

అవిరలదయార్ద్రలోచనసేవనయా ధూతతాపా హి |

ప్రతికల్పం సురసంఘాస్త్వామభజన్ నుతినతిప్రముఖైః   || 248  ||

దీనానాం చ కవీనాం వాణి త్వం కామధేనురసి మాతః |

సిద్ధిస్తేషామతులా సురమాన్యా తేన సంకలితా   || 249  ||

సకలజగతాం హి జననీం వాణి త్వాం సంతతముపాసే |

శ్రుతిసుదతీభూషామణిమఖిలార్థప్రాప్త్యై లోకే   || 250  ||

ధాతుః కుటుంబినీ త్వం సన్మంగలదాయినీ స్వమాహాత్మ్యాత్ |

శ్వశ్రూశ్వశురముఖాదిప్రీణనచతురా చ భాసి నిగమకలా   || 251  ||

ముఖవిజితచంద్రమండలమిదమంభోరుహవిలోచనం తేజః |

ధ్యానే జపే చ సుదృశాం చకాస్తి హృదయే కవీశ్వరాణాం చ   || 252  ||

యస్మై ప్రసన్నవదనా సా వాణీ లోకమాతా హి |

తస్య సహసా సహస్రం లాభః స్యాద్ బాంధవాః సుఖినః   || 253  ||

తాపహరరసవివర్షణధృతకుతుకా కాపి నీలనలినరుచిః |

కాదంబినీ పురస్తాదాస్తాం నః సంతతం జననీ   || 254  ||

పద్మాక్షనాభిపద్మజదయితే లోకాంబ శారదేతి సదా |

తవ నామాని జపన్ సన్ త్వద్దాసోఽహం తు ముక్తయే సిద్ధః   || 255  ||

అంబాప్రసాదభూమ్నా నరో హి భుంక్తే సుఖాని వివిధాని |

స్మరే విజయః కవితాధనలక్ష్మ్యాదేర్విలాసలీలాదిః   || 256  ||

తీరం సంసృతిజలధేః పూరం కమలజవిలోచనప్రీతేః |

సారం నిగమాంతానాం దూరం దుర్జనతతేర్హి తత్తేజః   || 257  ||

అపి దాసకులే జాతః కటాక్షభూమ్నా విధాతృముఖపత్న్యాః |

జ్ఞానీ భవవారాశిం తరతి చ రాజ్యశ్రియం  భుంక్తే   || 258  ||

సత్కృతదేశికపాదాంబుజయుగలోఽహం నమామి వాణి త్వాం |

త్వం తు గురుమూర్తిరుక్తా కాలే కాలే చ కాంక్షితవిధాత్రీ   || 259  ||

జ్ఞానానందముఖాదీనపవర్గం వా దదాసి భక్తేభ్యః |

అత ఏవానన్యగతిస్త్వాం విధిపత్నీం ప్రపద్యేఽహం   || 260  ||

త్వయి విన్యస్తభరాణాం న హి చింతా జాయతే నృణాం కాపి |

పరమానందాదికలాస్ఫూర్తిర్దివిషద్గణేన సంమాన్యా   || 261  ||

సుమశరసామ్రాజ్యకలామంగలవిధిరేఖికా వాణీ |

ధాతురపి చిత్తవృత్తిస్థైర్యం త్వన్యాదృశం కురుతే   || 262  ||

సా ధేనుశ్చింతామణిరపి వృక్షః సంపదాం ప్రదాయిన్యః |

అంబ త్వమేవ కాలే భసి జ్ఞానప్రదా వ్యపోహ్య తమః   || 263  ||

మనసో నైర్మల్యప్రదమస్యాః సేవే కటాక్షమహమారాత్ |

యః కురుతే జనతాం తాం హతమాయాం మధురామయోధ్యాం చ   || 264  ||

శరదివ హంసకులేడ్యా జ్యోత్స్నేవ జనార్తిహారిణీ వాణ్యాః |

జయతి హి కటాక్షరేఖా దీపకలేవ ప్రకామహతతిమిరా   || 265  ||

పంకజభవవదనమణిం పరవిద్యాదేవతాం వాణీం |

నిత్యం యజతాం జపతాం న హి తుల్యోఽస్మిన్ క్షమాతలే కశ్చిత్   || 266  ||

వాణీ నిజవాణీభీ రచయతి నుతిమాత్తవీణయా కాలే |

ధాతుః ప్రసాదహేతోః పతివ్రతాలక్షణైరన్యైః   || 267  ||

ఆనందయతి విలసైరంబా పద్మాసనం నిజం దేవం |

తేనైవ తుష్టహృదయః శుభాక్షరాణ్యాదరాల్లిఖతి మౌలౌ   || 268  ||

మమ మానసదుర్మదగజమపారతాపాటవీషు ధావంతం |

విరచయ్య ముదితచిత్తం కురు వాణి త్వత్పదాబ్జకృతహస్తం   || 269  ||

కమలాసనధైర్యమహీధరకులిశస్తే కటాక్ష ఏవాయం |

కవికులమయూరకాదంబినీవిలాసో ముదేఽస్తు సతతం నః   || 270  ||

గురువరదనాంభోజే నృత్యంతీ శారదా దేవీ |

మధురతరశ్లోకనిభా మణినూపురనినదసంతతిర్భ్తి   || 271  ||

కో వా న శ్రయతి బుధః శ్రేయోఽర్థీ తామిమాం వాణీం |

యాం పంకజాక్షనాభిజసధర్మిణీమర్చయంతి సురనాథాః   || 272  ||

ముషితపయోజమృదిమ్నా చరణతలేనాత్ర మానసే వాణీ |

పరిహరతు పాపరాశిం సురౌఘసంమానితేన కాలే మే   || 273  ||

యాథార్థ్యజ్ఞానకలాప్రాప్త్యై త్వాం శారదాం వందే |

సేవాఫలం ప్రయచ్ఛ ప్రసీద పరమేశి వల్లభే ధాతుః   || 274  ||

నిగమాంతసారమర్థం బోధయసి త్వం గురూన్ ప్రకల్ప్య భువి |

సైషా మే జ్ఞానఘనా వాణీ నిత్యం ప్రసన్నాసి   || 275  ||

మందారకుసుమమదహరమందస్మితమధురవదనపంకరుహా |

హృద్యతమనిత్యయౌవనమండితగాత్రీ విరాజతే వాణీ   || 276  ||

సౌభాగ్యసూచకాభీ రేఖాభిర్భూషితం సౌరైర్వంద్యం |

అంబాచరణపయోజం వతంసయన్ ప్రాప్తసంమోదః   || 277  ||

ద్విజగణపూజ్యం నిత్యం నిరస్తజాడ్యం త్వదీయపాదయుగం |

క్షణమపి వా సాంనిధ్యం భజతు మదీయే హృది స్వైరం   || 278  ||

నతదేవరాజమకుటీమణిఘృణిపరిచుంబితాంఘ్రికమలా నః |

కమలాసనస్య దయితా తన్యాదన్యాదృశీ శ్రియం భజతాం   || 279  ||

వాణీ శ్రితకాదంబా దంభాదిరిపూన్ నిరస్య నః కాలే |

క్షేమమవన్యాం తన్యాత్ పదే పరే దేవసంఘపరిసేవ్యే   || 280  ||

పంకజభవసామ్రాజ్యస్థిరలక్ష్మీశ్చపాండరతనుశ్రీః |

నతమానవసుకృతకలాపరిపాటీ భాతి సకలగుణపేటీ   || 281  ||

ముఖవిజితచంద్రబింబా సాంబా కాదంబసేవ్యపదకమలా |

కమలాసనగృహలక్ష్మీర్లక్ష్మీం పుష్ణాతు శారదా దేవీ   || 282  ||

మురమథనస్యేవ రమా శంభోరివ సకలభూధరేంద్రసుతా |

వాణి విధాతుః సదనేఽనురూపదాంపత్యసంపదా భాసి   || 283  ||

వాణి తవ దేహకాంత్యా కటాక్షలహరీ తు సంయుతా కాలే |

ధత్తే కామపి శోభాం సురస్రవంత్యేవ సంగతా యమునా   || 284  ||

మధురాసేచనదృష్ట్యా మాం పాయాదాపదో ముహుర్వాణీ |

ఆశ్రితతాపవిభేత్రీత్యేవం యామామనంతి సూరివరాః   || 285  ||

అజ్ఞాతకోపపూరా యస్యా దృష్టిః కృతాదరా భజతాం |

సైషా విహసితపౌరందరలక్ష్మీం  సంపదం దద్యాత్   || 286  ||

బాలకురంగవిలోచనమీషత్స్మితమధురమాననం వాణ్యాః |

మణిమయతాటంకమణీవిలాసి భూయాన్ముదేఽస్మాకం   || 287  ||

మునిజనమానసహంసీం శ్రుతితతిపంజరశుకీం మహాదేవీం |

నౌమి స్నుషాం రమాయాః మాహేశ్వరమహితసత్పదప్రాప్త్యై   || 288  ||

ధాతుః సౌధాంగణకృతచంక్రమణాం శారదాం నౌమి |

మత్తమతంగజగమనాం పరిపంథిజయాయ సుకృతిసందృశ్యాం   || 289  ||

వాగీశముఖా దేవా యస్యాః ప్రసదనబలద్ధి విజయంతే |

పరిపాలితభక్తగణా యద్ధ్యానోల్లసదపారపులకాంతాః   || 290  ||

నైసర్గికవాక్ష్రేణీకేలివనమమలభూషణం ధాతుః |

వదనానామియమంబా జయతు చిరం కామవర్షిణీ భజతాం   || 291  ||

కలయామి హృదయమేతత్ పాదాబ్జే శారదాదేవ్యాః |

ప్రాప్తారిషట్కవిజయం తత్త్వధనం  కలితశారదాధ్యానం   || 292  ||

పాదారవిందనమనప్రభావపరికలితదేవసారూప్యాః |

పరమానందనిమగ్నాః సుధియో భాంతి క్షమావలయే   || 293  ||

లలితవిధాతృరూపం పాలితలోకత్రయం చ తత్ తేజః |

సకలాగమశిఖరకలాపరతత్త్వం శారదారూపం   || 294  ||

ధ్యానైర్యోగైశ్చ జపైర్యత్ సేవ్యం పరమమాదిష్టం |

తన్నశ్చకాస్తు హృదయే విశ్వజనీనం హి భక్తానాం   || 295  ||

భాగీరథీవ వాణీ తవ నుతిరూపా విరాజతే పరమా |

ఇహ మాతర్యద్భజనం సర్వేషాం సర్వసంపదాం హేతుః   || 296  ||

సంతతమధురాలాపైర్లాలితవిధివైభవైరమేయకలైః |

శ్రేయఃప్రదానదీక్షితకటాక్షపాతైర్మహాతత్త్వైః   || 297  ||

ఖేలల్లోలంబకచైః కుచభరనమ్రైః పురంధ్రిగుణపూర్ణైః |

ఆశ్రితసంవిత్పీఠైరమరేశవధూకరాదృతచ్ఛత్రైః   || 298  ||

వీణాపుస్తకహస్తైర్విధిభాగ్యైరస్తు మమ తు సారూప్యం |

సంవిద్ధనైశ్చ వాణీరూపైరేతైర్దయాసారైః   || 299  ||

మాతః కథం ను వర్ణ్యస్తవ మహిమా వాణి నిగమచయవేద్యః |

ఇతి నిశ్చిత్య పదాబ్జం తవ వందే మోక్షకామోఽహం   || 300  ||

త్వామంబ బాలిశోఽహం త్వచమత్కారైర్గిరాం గుంభైః |

అయథాయథక్రమం హి స్తువన్నపి ప్రాప్తజన్మసాఫల్యః   || 301  ||