శ్రీ శారదా స్తోత్రం: జ్ఞాన ప్రదాత స్తోత్రం
శ్రీ శారదా దేవి, సర్వవిద్యాలయము, జ్ఞాన ప్రదాత, సంగీత, కళలకు అధిదేవత. ఆమెను స్తుతించే స్తోత్రాలలో ప్రముఖమైనది “శ్రీ శారదా స్తోత్రం – Sri Sharada Stotram”. ఈ స్తోత్రం పఠించడం వలన జ్ఞానం, బుద్ధి, అంతర్దృష్టి వృద్ధి చెందుతాయని భక్తుల విశ్వాసం.
శ్రీ శారదా స్తోత్రం, జ్ఞాన దేవత స్తోత్రం, పఠించడం వల్ల జ్ఞానం, బుద్ధి, అంతర్దృష్టి వృద్ధి చెందుతాయని భక్తుల విశ్వాసం. ఈ స్తోత్రం పఠించడం వలన జీవితంలో సకల శుభాలను తెచ్చిపెడుతుంది. శృంగేరి శంకరాచార్యులు (Shankaracharya) రచించిన ఈ స్తోత్రం, శారదా దేవిని స్తుతించే భక్తి గీతం. శారదా దేవిని జ్ఞాన దేవతగా పూజిస్తారు. శృంగేరి మఠానికి (Sringeri Mutt) చెందిన జగద్గురువు, శ్రీ సచ్చిదానంద శివాభి నవనృసింహ భారతీ స్వామి వారు రచించిన శ్రీ శారదా దేవికి అంకితమైన స్తోత్రం. శ్రీ శారదా దేవికి ప్రసిద్ధి చెందిన శృంగాద్రి (Sringeri) కొండపై జరిగే నవరాత్రి పండుగ సమయంలో ఆమెను ప్రత్యేకంగా పూజిస్తారు.
శ్రీ శారదా స్తోత్రం పఠించడం వల్ల కలిగే ప్రయోజనాలు
శ్రీ శారదా దేవి (Sharada Devi) , జ్ఞాన, సంగీత, కళలకు అధిదేవత. ఆమెను స్తుతించే స్తోత్రాలలో ప్రముఖమైనది శ్రీ శారదా స్తోత్రం. ఈ స్తోత్రం పఠించడం వల్ల భక్తుల జీవితంలో అనేక మార్పులు చోటుచేసుకుంటాయి.
మానసిక ప్రయోజనాలు:
- జ్ఞాన వృద్ధి: శారదా దేవి జ్ఞాన ప్రదాత. ఆమె స్తోత్రాన్ని పఠించడం వల్ల మనస్సులో జ్ఞాన ప్రకాశం కలుగుతుంది. విద్యార్థులు, పండితులు ఈ స్తోత్రాన్ని పఠించడం వల్ల అధ్యయనంలో ఎదురయ్యే అడ్డంకులు తొలగిపోయి, జ్ఞానం పెరుగుతుంది.
- ఏకాగ్రత పెరుగుదల: మనసును ఒకే చోట కేంద్రీకరించడం అనేది అనేక రంగాలలో విజయానికి కీలకం. శారదా స్తోత్రం పఠించడం వల్ల మనస్సులోని చంచలత్వం తగ్గి, ఏకాగ్రత పెరుగుతుంది.
- బుద్ధి వృద్ధి: శారదా దేవి ఆశీర్వాదం వల్ల మనస్సులో స్పష్టత వస్తుంది. దీంతో సమస్యలను విశ్లేషించి, సరైన నిర్ణయాలు తీసుకునే సామర్థ్యం పెరుగుతుంది.
- మనశ్శాంతి: ఆధునిక జీవనంలో ఒత్తిడి (Stress), ఆందోళన సర్వసాధారణం. శారదా స్తోత్రం పఠించడం వల్ల మనసు ప్రశాంతంగా ఉంటుంది.
- ఆత్మవిశ్వాసం పెరుగుదల: శారదా దేవి (Goddess Sharada Devi) ఆశీర్వాదం వల్ల మనస్సులో ఆత్మవిశ్వాసం పెరుగుతుంది. కష్టతరమైన పరిస్థితులను ఎదుర్కొనే శక్తి లభిస్తుంది.
భౌతిక ప్రయోజనాలు:
- కళా ప్రతిభ: కళాకారులు, సంగీతకారులు (Artists and musicians) ఈ స్తోత్రాన్ని పఠించడం వల్ల వారి కళా ప్రతిభ పెరుగుతుంది. వారి సృజనాత్మకతకు కొత్త మార్గాలు తెరుచుకుంటాయి.
- సమస్యల పరిష్కారం: శారదా దేవి ఆశీర్వాదం వల్ల జీవితంలో ఎదురయ్యే సమస్యలను సులభంగా పరిష్కరించగల సామర్థ్యం లభిస్తుంది.
- ఆరోగ్యం: శారదా దేవి ఆరోగ్య (Health) దేవతగా కూడా పూజించబడుతుంది. ఆమె స్తోత్రాన్ని పఠించడం వల్ల శరీరం ఆరోగ్యంగా ఉంటుంది.
ముగింపు
శ్రీ శారదా స్తోత్రం (Sri Sharada Stotram) అనేది అద్భుతమైన స్తోత్రం. ఈ స్తోత్రం పఠించడం వల్ల మన జీవితంలో జ్ఞానం, బుద్ధి, కళలు, మనశ్శాంతి (Peace of Mind), ఆధ్యాత్మిక అభివృద్ధి వంటి అనేక అంశాలలో అభివృద్ధి చెందవచ్చు. శ్రీ శారదా దేవి అనేది జ్ఞానం, సృజనాత్మకత (Creativity), విద్య యొక్క స్వరూపం. ఆమె ఆశీర్వాదం మన జీవితాలను ప్రకాశవంతం చేస్తుంది.
Sri Sharada Stotram Telugu
శ్రీ శారదా స్తోత్రం తెలుగు
“శ్రీ శృంగాద్రౌ శ్రీ శారదా నవరాత్రోత్సవ సమయే”
రత్నావలీనిర్మితశైలశృంగవిభ్రాజదాపూర్ణసుధాకరాభం
ఆకంఠరక్తాంబరసంవృతాంగ్యా ముఖాంబుజం భాతి జగజ్జనన్యాః || 1 ||
ఆకంఠమానమ్రజనానురాగో మమేతి లోకస్య విబోధనాయ
ఆకంఠరక్తాంబరసంవృతాంగీ పద్మోత్థజాయా ప్రవిభాతి నూనం || 2 ||
ఏవం సర్వజగంత్యప్యుత్సంగే సన్నిధాయ రక్షామి
ఇతి బోధనాయ జగతామంకే బాలం దధాసి మాతస్త్వం || 3 ||
శిశుమివ పదనతలోకం పరిరక్షామీతి బోధనాయైవ
అంకే నిధాయ బాలం భాతీయం పంకజాతభవదయితా || 4 ||
స్థాలీపులాకాఖ్యనయేన మాతర్జగంతి సర్వాణ్యపి పాలయామి
ఇత్యేతదర్థస్య విబోధనాయ బాలం నిజాంకే విదధాసి కిం త్వం || 5 ||
ఏకమేవాంబరం వాణి విరూపం చ వదంతి హి
నవాంబరాణి ధత్సే త్వం సురూపాణి కథం వద || 6 ||
ఆకాశవత్సర్వగతశ్చ నిత్య ఇత్యాది వేదేఽమ్బ కిలాంబరస్య
ప్రత్నత్వమేకత్వమపి ప్రసిద్ధం కథం నవత్వం సమభూదముష్మిన్ || 7 ||
పురాణవస్త్రాణి న ధారయామి నవాంబరాణ్యేవ తు ధారయామి
ఇతి ప్రబోధాయ జనస్య నూనం నవాంబరాణ్యేవ దధాతి వాణీ || 8 ||
భవంతు విజరామరాః పదసరోజనమ్రా ఇతి
ప్రకృష్టదయయా విధేః సఖి సరోజతుల్యాననే
కరస్థకలశామృతం నతజనాయ దాతుం స్వయం
మహార్హమణినిర్మితం చషకమంబ ధత్సే కిము || 9 ||
త్యక్ష్యామి నైవ రాగం కాలత్రితయేఽపి నమ్రవర్గేషు
ఇతి బోధనాయ వాణీ రక్తసుమానాం త్రయం ధత్తే || 10 ||
హంసైరేవ పరైః సేవ్యా నాహమన్యైర్జనైరితి
ప్రబోధనకృతే మాతర్హంసం వాహం కరోషి కిం || 11 ||
హంసే హి శబ్దే కిము ముఖ్యవృత్త్యా స్థితాహమేవేతి విబోధనాయ
విభాసి హంసే జగదంబికే త్వమిత్యస్మదీయే హృదయే విభాతి || 12 ||
హంసోఽప్యహంస ఇతి బోధమవాప్య ముక్తిం
ప్రాప్తః పరస్తవ పదాంబుజసంశ్రయాద్యత్
తస్మాత్తవాంబ పదయుగ్మమయం ముముక్షు-
ర్హంసః సమాశ్రయతి వాహనతామవాప్య || 13 ||
విరించిహృదయాంబుజప్రమదదానసూర్యప్రభే
విచిత్రగతిచాతురీప్రథితపాదపంకేరుహే
కరోతి కిమయం సదా గమనచాతురీప్రాప్తయే
మరాలకులనాయకస్తవ పదాబ్జసేవాం ముదా || 14 ||
హంసో బాహ్యాంధకారప్రదలనచతురో హ్యహ్ని మోదప్రదాయీ
పద్మానామేష మేఽన్తఃస్థితతిమిరతతేర్వారయిత్ర్యాశ్చ రాత్రౌ
అప్యామోదప్రదాత్ర్యా నతహృదయసరోజాతపంక్తేరధస్తాత్
భూతో హీత్యేవ బోధం రచయితుమివ కిం హంసమారోహసీశే || 15 ||
కర్తుమాత్మని సార్థా కిం వృషేంద్రః పుర ఏతు నః
ఇత్యాదికాం శ్రుతిం వాణి పురస్తాత్కురుషే వృషం || 16 ||
వృషభో వృషభో నో చేత్కథం తవ పదాంబుజం
వాణి సేవితుమర్హః స్యాత్తస్మాద్వృషభ ఏవ హి || 17 ||
వృషం పురస్తాత్కురుషే కిమద్య వృషప్రదానాయ నమజ్జనేభ్యః
ద్రుతం పయోజన్మభవప్రమోదపయోధిరాకాశశిబింబపంకే || 18 ||
పశుపః శివోఽయమితి తం విహాయ కిం వాక్తతిప్రదామాశు
పశుతానివృత్తయేఽయం వృషభస్త్వాం సేవతే మాతః || 19 ||
శార్దూలచర్మ పరివీక్ష్య భవాంగసంస్థం
భీతః పలాయ్య తవ సన్నిధిమాగతః కిం
ఉక్షాధిపః సరసిజాసనధర్మపత్ని
బ్రూహ్యద్య సంశయనిమగ్నమతేర్మమాశు || 20 ||
పునరుపనయనం పుంసో వృషాధిరోహే న కామిన్యాః
దర్శయతి తత్స్త్రియోఽపి హి వృషభారూఢా త్రినేత్రేయం || 21 ||
నీలకంఠస్య సార్వజ్ఞ్యమూలం త్వత్పాదసేవనం
ఇతి సంబోధయన్నీలకంఠస్త్వాం సేవతే కిము || 22 ||
శిఖీ ముండీ జటీత్యాద్యాః సర్వే త్వత్సేవకా ఇతి
ద్యోతనాయ శిఖీ కిం వా మాతస్త్వామేవ సేవతే || 23 ||
నిశమ్య సంప్రేషితవాన్మయూరముద్ధర్ష ఇత్యేవ పితృష్వసుః కిం
షడాననో బ్రూహి గిరాం సవిత్రి నమ్రస్య సందేహయుజో మమాశు || 24 ||
కిం వర్ణయామి తవ సుందరతాం మనుష్యో
యత్సుందరత్వమభివీక్ష్య మయూరపక్షీ
హిత్వా విరూప ఇతి షణ్ముఖమాశు మాతః
వాసం కరోతి తవ పాదసరోజమూలే || 25 ||
దృష్ట్వా త్వదీయకచసంతతినీలమేఘం
సర్వర్తుషూదయనమేత్య మయూర ఏష
నిత్యప్రహర్షదతయా విరహాసహిష్ణుః
నూనం త్వదంఘ్రినికటే స్థితిమాతనోతి || 26 ||
కేకా న పూజయేయుస్త్వాం భువనేఽస్మిన్మహోత్సవే వాణి
ఇతి నామ్నైవ హి వక్తుం భాతి త్వత్సన్నిధౌ కేకీ || 27 ||
శిఖిసూర్యచంద్రముఖ్యానహమేవాస్థాయ పాలయామీదం
జగదితి నిబోధనార్థం వాగీశ్వరి భాసి శిఖినమాస్థాయ || 28 ||
శంభౌ సంతి శశాంకసూర్యశిఖినో నేత్రాపదేశాత్సదా
సాగర్భ్యం త ఇమే నిరీక్ష్య గిరిజానాథస్య మాతస్త్వయి
వక్త్రారక్తపటీసువాహమిషతః సేవాం సదా కుర్వతే
మోదాదేవ హి తే న చాత్ర విశయః కశ్చిద్గిరాం దేవతే || 29 ||
కేకాతోఽపి మనోహరేణ వచసా త్వన్నిర్జితః కేక్యయం
పాదాంభోజయుగం ప్రపన్న ఇతి మచ్చిత్తే విభాత్యంబికే
జేతుః పాదయుగప్రపత్తిరథవా దేశాంతరావస్థితిః
యుక్తం చాన్యతరజ్జితస్య విబుధాః ప్రాహుర్యతో భారతి || 30 ||
శిఖివచ్ఛుద్ధ ఏవేతి నామ్నైవాహ యతః శిఖీ
తస్మాత్త్వద్వాహతా చాస్య యుక్తైవ విధివల్లభే || 31 ||
ముక్తాహారమిమం జగజ్జనని తే శుభ్రాహిబుద్ధ్యా కిము
గ్రీవాస్థం హ్యయమగ్రహీద్భుజగభుగ్భోక్తుం తతో లబ్ధధీః
నాయం సర్ప ఇతి స్వమోహమధునాపహ్నోతుమేవాత్యజ-
న్నైవాలంకృతిలక్ష్యతః పరమహో ధత్తే బుధః పూర్వవత్ || 32 ||
ఆద్యా మత్సమయీ తనుర్మధురిపోః కౌర్మం ద్వితీయం వపు-
స్తద్యుగ్మం త్వమిహాంబ నేత్రపదయోర్వ్యాజేన ధత్సే యతః
తస్మాచ్చక్రయుగం తవోరసి కుచవ్యాజేన భాత్యంబికే
తస్మాదేవ ఖగేశ్వరశ్చ సతతం త్వాం సేవతే మోదతః || 33 ||
విష్ణౌ వీక్ష్య జడాధివాసమథ చ స్వామిత్రశాయిత్వమ-
ప్యండోద్భూతపతిర్విహాయ తమిమం విజ్ఞానరూషామయం
త్వామేవాద్య నిషేవతే ఖలు ముదా వాగ్దేవి యుక్తం చ త-
త్కో వా శత్రుసహాసికాం హి సహతే లోకేషు విద్వజ్జనః || 34 ||
భూతాకాశచరేట్ త్వమేవ భువనే సిద్ధం హి కా తేన మే
వృద్ధిశ్చాభవదిత్యవేత్య ఖగరాణ్ణూనం గిరాం దేవతే
హార్దాకాశచరాధిపత్యమపి మే భూయాదితీచ్ఛాబశాత్
తత్ప్రాప్త్యై తవ పాదపంకజయుగీసేవాం కరోత్యాదరాత్ || 35 ||
వినతాతనూద్భవత్వం ప్రకటం ప్రభవేద్వినత్యైవ
ఇతి బుద్ధ్యా ఖగరాట్ కిం వినతస్త్వత్పాదపద్మయోర్వాణీ || 36 ||
మానసవిహరణశీలాం దేవీం త్యక్త్వాన్యదేవతాసేవా
నైవోచితేతి ఖగరాడ్వహతి త్వాం తాదృశీ నూనం || 37 ||
సువర్ణనీకాశ భవత్ప్రతీకకాంతేః పరిష్వంగత ఏవ సార్థా
ముపర్ణతేత్యాత్మన ఆకలయ్య ఖగేట్ కరోత్యంబ తవాంఘ్రిసేవాం || 38 ||
ఆగత్య కాలాహిధియా హి వేణీ
గిహీతుకామః ఖగరాణ్ణిరీక్ష్య
నిహ్నోతుమిచ్ఛత్యయమంబ నైజాం
భ్రాంతిం త్వదంఘ్రేః పరిసేవనాత్కిం || 39 ||
లోకే హ్యేకః పక్షః శుక్లశ్చాన్యశ్చ కృష్ణ ఏవేహ
ద్వావపి శుక్లౌ పక్షౌ ధత్తే గరుడః కిమంబ తవ వాహః || 40 ||
హస్తాంతరస్థపరశుం శంభోర్భూషార్థమాగతాన్నాగాన్
దృష్ట్వా భీతో హరిణశ్చరణం శరణం జగామ తవ వాణి || 41 ||
ధత్తే కురంగం విధురేష పూర్ణో మదాస్యచంద్రస్తమధః కరోతి
ఇత్యేతయోర్భేదవిబోధనాయ కురంగమంబ త్వమధః కరోషి || 42 ||
సమాశ్రయేయం యది పుష్కరస్థ-
మబ్జం తదా స్యాత్పతనం హి దర్శే
మమేతి మత్వా మృగశాబకోఽయం
పదాబ్జమేవాశ్రయతే తవాంబ || 43 ||
శుక్లాదౌ శశినం స్వకీయశరణం పూర్ణ విచిన్వన్మృగో
వాణ్యాస్యం తవ వీక్ష్య హృష్టహృదయః పూర్ణో మయా చంద్రమాః
ప్రాప్తశ్చేతి తవాంఘ్రిసన్నిధిమసావాగత్య వేగాత్తతో
నాస్మిన్నాస్తి మమావకాశ ఇతి కిం తిష్ఠత్యయం భారతి || 44 ||
పురా తవ పదాంబుజం హరిణ ఏష సంపూజ్య యో
జగత్ప్రభుశిరఃస్థితే శశిని సంస్థితం ప్రాప్తవాన్
కిమద్య హృది సంస్మరంస్తవ పదాబ్జసేవాఫలం
మహోత్సవదిదృక్షయా చరణసన్నిధిం ప్రాప్తవాన్ || 45 ||
పిబేయురపి మాం సురా యది వసామి చంద్రే తదే-
త్యపాయరహితం పదం జిగమిషుశ్చిరం సంచరన్
అపాయవచనోజ్ఝితం తవ పదాబ్జయోరంతరం
విలోక్య మృగశాబకో వసతి తత్ర వాగ్దేవి కిం || 46 ||
భక్తాజ్ఞానమహేభా మద్వాహనసన్నిరీక్షణాదేవ
నిర్యాంత్వితి సహసా కిం సింహం వాహం కరోషి మాతస్త్వం || 47 ||
లాలయతి వాణి కిం త్వాం పంచాస్యః స్కంధమారోప్య
యుక్తమిదం భ్రాతృణాం సోదర్యాలాలనం లోకే || 48 ||
విష్ణ్వర్ధత్వాత్పాలకత్వం మమాస్తే
సంహర్తృత్వం నైజమేవాస్తి కిం తు
స్రష్టుర్భావో వాణి నాస్తీతి మత్వా
తత్ప్రాప్త్యై త్వాం సేవతే పంచవక్త్రః || 49 ||
తవాంబరాభావశశీయశృంగ-
నీకాశమధ్యత్వమయం నిశమ్య
వలగ్నకార్శ్యాధ్యయనాయ కిం వా
పదాబ్జసేవాం విదధాతి సింహః || 50 ||
నతాయ పాదాంబుజయోర్జనాయ
రాజాధిరాజత్వవిధిత్సయా కిం
సింహాసనం త్వం వద దాతుమంబ
సిహం సదా సన్నిధిగం కరోషి || 51 ||
వనే జాతః సింహః పునరపి దరీవాసనిరతః
స్వసామ్యం యత్ర స్యాత్సతతవసతిం తత్పరిసరే
చికీర్షన్భ్రాంత్యా కిం తవ పదవనేజే నతమనో
గుహావాసే దృష్ట్వా వసతిమకరోత్తత్పరిసరే || 52 ||
నాథస్యాపి మమానివేద్య హరిణః సేవాం కథం ప్రాతనో-
ద్వాగ్దేవ్యాశ్చరణాబ్జయోరితి రుషా సారంగబాలం భృశం
కృత్వా శీఘ్రపలాయనోత్సవపరం సేవాం కరోత్యాదరాద్-
దృశ్యేశః స్వయమిత్యవైమి కరుణావారాన్నిధే శారదే || 53 ||
కురంగవేగస్తవ దృష్టపూర్వస్తురంగవేగం పరిపశ్య వాణి
ఇతీవ గర్వాదధిగమ్య మాతస్తురంగమస్త్వాం పరిసేవతే కిం || 54 ||
తురంగవచ్చంచలమంబ చిత్తం బద్ధ్వా దృఢం భక్తిగుణేన శీఘ్రం
స్థిరం కరోమీతి గుణైస్తురగం నియమ్య కిం బోధయసే జనాంస్త్వం || 55 ||
త్వమశ్వపూర్వాం శ్రియమానతాయ దదామి తూర్ణం త్వితి బోధనాయ
తురంగమగ్రే విదధాసి మాతరితీవ మన్యే వద కిం తథైవ || 56 ||
ఉన్నమ్య పాదద్వితయం తురంగో వదన్నితీవాస్తి గిరాం సవిత్రి
విలంఘ్యతాం కిం సరిదీశ్వరోఽయముత్ప్లుత్య గచ్ఛేయమథాంబరం వా || 57 ||
పదే పదే దానవశ్యతా మే భవేచ్ఛచీనాథసమీపవాసే
ఉచ్చైఃశ్రవా ఇత్యధిగమ్య మాతస్తవాంఘ్రిసేవాం ప్రకరోతి కిం వా || 58 ||
అశ్వో వాహనతాం న యాతి దివిషద్వృందయస్య వేదా ఇతి
ప్రాహుస్తం చ నిశమ్య రోషసహితస్త్వత్సన్నిధిం ప్రాప్య కిం
మిథ్యా కర్తుమహో తదీయవచనం దేవ్యాస్తవాంబానిశం
వాహత్వం కుతుకీ జగామ తురగాధీశో గిరాం దేవతే || 59 ||
విహంగం కురంగం తురంగం చ వాహం
విధాయాశుగం భ్రాంతిమాసాద్య కి త్వం
గజం మందగం వాహమద్యాతనోషి
ప్రణమ్రస్య మే బ్రూహి వాచామధీశే || 60 ||
నతేష్టదానాయ సదా జలార్ద్రకరాంబుజా త్వం యత ఏవ వాణి
తస్మాదిభోఽప్యేష తవాంఘ్రిసంగాద్దానాంబుసంసిక్తకరో విభాతి || 61 ||
కేచిత్ప్రాహురనైపుణాస్తు కుచయోః సామ్యం హి కుంభస్థలే
శుండాయామథవోరుతౌల్యమిభరాడిచ్ఛస్తవాగాదితి
నైతత్సంభవితా తనౌ కఠినతా యస్మాత్తతః శారదే
మన్యే హ్యుత్సవసేవనాయ హరిణా సంప్రేషితః స్యాదితి || 62 ||
మమ కౌశికవాహనతా భవేద్ధర్యశ్వస్య సేవనే కిమితి
శుక్లేభస్తవ వాహః సమభూన్మాతర్న సందేహః || 63 ||
జంభారౌ కౌశికత్వం హ్యథ చ తదనుజే వీక్ష్య సమ్యగ్ఘరిత్వం
త్యక్త్వా హ్రీసాధ్వసాభ్యామయమిభకులరాట్టౌ శరచ్చంద్రశుభ్రః
ఇంద్రోపేంద్రాదిసేవ్యామపి సకలసురారాధ్యపాదారవిందాం
త్వామేవాతిప్రమోదాత్కమలజదయితే సేవతే నూనమేతత్ || 64 ||
మత్పాదాబ్జప్రణమ్రం నరమతితరసా సేవతే చేభముఖ్యా
లక్ష్మీర్హస్తాగ్రరాజద్వరకనకమయస్రగ్ధరేత్యేవ బోధం
కర్తుం హస్తాగ్రరాజద్వరకనకసరం నాగరాజం ప్రధత్సే
వాణి ప్రబ్రూహి కిం త్వం కమలజహృదయాంభోజసూర్యప్రభే మే || 65 ||
ఏకః శుకః ప్రసిద్ధోఽస్తి పారాశర్యసుతః కిల
శుకోఽపరస్తు కో బ్రూహి శారదే ప్రణతాయ మే || 66 ||
ఏకం శరీరం పరిగృహ్య పూర్వభవే శుకోఽయం కృతవాన్విచారం
మోక్షాయ నాలం స ఇతీహ దేహద్వయం గృహీత్వా కిము సేవతే త్వాం || 67 ||
దంతేషు కిం దాడిమబీజబుద్ధ్యా తవాధరే బింబధియాథవాయం
శుకః కుతస్త్వన్నికటే చకాస్తి సందేహయుక్తాయ వదాశు మాతః || 68 ||
శ్రుత్వా తవాంబ నినదం కిల కీరడింభః
కంఠే తవాస్తి శుక ఇత్యయమాకలయ్య
ఇచ్ఛన్వినిర్గమనమస్య బహిస్తవాద్య
హస్తాంబుజే స్థిరతయా వసతీతి మన్యే || 69 ||
క్షుధాఽఽతురః కశ్చన కీరడింభ-
స్తృషార్దితోఽన్యశ్చ తయోర్హి మాతః
ఏకస్తు కర్ణోత్పలమత్తుమిచ్ఛ-
త్యన్యః కరస్థామృతపానకామః || 70 ||
పాదనమ్రపురుషాన్కిం బోధయితుం లజ్జయా గిరాం దేవి
అపిధాయ నైజరూపం ధత్సే పురుషాకృతిం బ్రూహి || 71 ||
ప్రసవిత్ర్యాం హి సుతానాం నైవ భవేత్సాధ్వసం కదాచిదపి
మత్వేతి బోధనకృతే గురువరరూపం దధాసి కిం మాతః || 72 ||
సర్వాత్మకత్వమథవా బోధయితుం స్వస్థ సర్వలోకానాం
స్వీకురుషే కిం పౌరుషమంబుజసంజాతమానిని బ్రూహి || 73 ||
ఝషౌ స్వజాతిదోషం కిమబలస్వకులాశనం
మాతర్నివేదనాయాక్షివ్యాజాత్కర్ణసమీపగౌ || 74 ||
అశక్నువన్స్తోతుమహీశ్వరస్త్వన్ముఖస్య సౌందర్యమయం జగామ
రసాతలం వక్త్రసహస్రతాం చ నినింద కంజాతభవస్య జాయే || 75 ||
అశక్నువంతస్తవ సుందరత్వం స్తోతుం మహేశాగ్నిభబాబ్జజాతాః
నినిందురాస్యేషు హి పంచకత్వం షట్ట్వం చతుష్ట్వం చ గిరాం సవిత్రి || 76 ||
నీలోప్యలోత్థః ఖలు నీలమేఘో
నమ్రాస్యమధ్యాత్కవితాప్రవాహం
ప్రవర్తయత్యాశు వదంతి చైనం
మాతస్తవాక్షిప్రభవం కటాక్షం || 77 ||
నీలోత్పలే త్వన్నయనే హి మాత-
స్తదుత్థమేఘః కరుణాకటాక్షః
స నమ్రవక్త్రాత్కవితాప్రవాహం
ప్రవర్తయత్యాశు న సంశయోఽత్ర || 78 ||
మాలా విభాత్యంబ తవాద్య కంఠే
క్వచిచ్చ రక్తా కచిదచ్ఛవర్ణా
బింబాధరస్య ప్రభయా హి నాసా-
మణేశ్చ కంత్యేతి వితర్కయామి || 79 ||
అక్షీణో నతచిత్తసంస్థితతమోనిర్వాపణేఽపి క్షమ-
శ్చాంకేనాప్యయుతస్తవాస్యరజనీనాథో గిరాం దేవతే
క్షీణేనాంకయుజా బహిఃస్థితతమోమాత్రాపనోదక్షమే-
ణాబ్జేనాయమహో కథం స లభతాం సామ్యం జగన్మాతృకే || 80 ||
దేబానామనిమేషతాద్య సఫలా జాతా తవాంబానిశం
వక్త్రాబ్జస్య నిరీక్షణాత్సురపతేస్తద్వత్సహస్రాక్షతా
గౌరీశస్య దశాక్షతా కమలజస్యాష్టాక్షతా భారతి
క్రౌంచారేర్ద్విషడక్షతాపి ఫలయుగ్జాతేతి జానీమహే || 81 ||
అస్యాబ్జస్య సమాశ్రయే మం భవేన్మోదో రజన్యాం పరం
నైవాహ్నీత్యత ఏవ చంపకసుమేనాలోచ్య నీలోత్పలే
సేవేతే తవ వక్త్రపద్మమనిశం నేత్రాపదేశాన్ముదా
రాత్రౌ వాసరమధ్యమేఽపి సుఖదం వాగ్దేవి న ద్వాపరః || 82 ||
చంద్రః సౌహార్దమిచ్ఛంస్తవ ముఖశశినా ప్రాప్య వృద్ధిం వలక్షే
పక్షే ప్రాప్యేషదంబ ప్రహృషితహృదయశ్చాభవత్పూర్ణిమాయాం
దృష్ట్వాథ త్వన్ముఖేందుం మృగశిశురహితం స్వం చ చిహ్నేన యుక్తం
లజ్జాయుక్తస్తతోఽయం ప్రతిదివసమహో క్షీణతాం యాతి కృష్ణే || 83 ||
దృష్టం వాగ్దేవతాయా వదనసరసిజం యేన భూమౌ కదాచి-
చ్ఛృంగాద్రౌ తస్య వక్త్రాత్సరసపదయుతా వాక్తతిర్నిఃసరేద్ధి
నీహారాద్రేర్గుహాతః సురవరతటినీ యద్వదాశ్వప్రయత్నా-
న్నిర్గచ్ఛత్యేవ తద్వన్న హి ఖలు విశయోఽస్మాకమత్రాస్తి కశ్చిత్ || 84 ||
ఏకాపి నానావిధరూపధర్త్రీ-
త్యేతాదృశార్థస్య విబోధనాయ
వేణ్యాం భుజంగీ నయనే కురంగీ
మధ్యే చ సింహీ ప్రతిభాసి కిం త్వం || 85 ||
కంబౌ పద్మం భాతి బింబం హి తస్మిన్
మల్లీపంక్తిశ్చాపి నీలోత్పలే ద్వే
సర్వం హ్యేతద్భాతి హైమ్యాం లతాయాం
శైలే చాస్మిన్పశ్యతైతద్విచిత్రం || 86 ||
విరాజతే కశ్చన వారిరాశి-
ర్మీనేన యుక్తో న హి కంబవోఽత్ర
కంబూపరిస్థస్త్వయమేవ మాతః
సనేత్రమాస్యం తవ చైనమాహుః || 87 ||
అకలంకః కిము చంద్రః కిం వా సద్యః ప్రఫుల్లమంబుభవం
సౌందయర్యుతవపుష్మద్వక్త్రం కిం వా తవాంబ న హి జానే || 88 ||
భుజగీ వా తవ వేణీ కిం వా కరపద్మపుష్పరసలోభాత్
ఆగతమధులిట్పటలీ జానీమో నైవ విధికాంతే || 89 ||
నాగేంద్రకుంభావుత హేమకుంభౌ
కిమంబ కోకౌ తవ కిం కుచౌ వా
వివేక్తుమత్రాస్తి న నోఽద్య శక్తి-
స్త్వమేవ మాతర్వద ధాతృజాయే || 90 ||
పయోజౌ కూర్మౌ వా సురవరశిరోభూషణమణీ
తరూ వా కల్పాద్యౌ నతజనచయాభీష్టవరదౌ
పదే వా మాతస్తే న తదితి వివేక్తుం హి విభవో
వయం తస్మాచ్ఛీఘ్రం వద కమలజాతప్రియతమే || 91 ||
నిర్గత్య శైలమధ్యాత్కుహరం కాచిద్గతా భుజగీ
తాం శంసంతి హి సుధియో మాతస్తవ నాభిరోమాలిం || 92 ||
సరస్యా జాతేయం న హి ఖలు కలిందాఖ్యగిరితః
సముద్రం నో యాతా హ్యపి తు వరశైలద్వయగతా
విభాతీత్థం కాచిత్త్వయి ఖలు గిరా దేవి యమునా
వదంత్యేనాం నాభిప్రసృతతనుజాలిం కవివరాః || 93 ||
కిం తత్పయోజయుగ్మం రంభాస్తంభౌ తతో వ్యోమ
తత్ర సరః సమృణాలం తదుపరి శైలౌ తతః పయోజాతం || 94 ||
దృష్టం వాగ్దేవతే తే సరసిజయుగలం పాదయుగ్మం హి రంభా-
స్తంభావూరుద్వయం తత్తదుపరి గగనం మధ్యభాగో హి నూనం
మన్యే నాభిః సరః స్యాత్తదుపరి కలయే రోమపంక్తిం మృణాలం
శైలద్వంద్వం కుచౌ స్యాత్తదుపరి కమలం త్వాస్యమేవేతి మన్యే || 95 ||
మాం ద్రష్టుమాకాశగతం హి మర్త్యా వక్త్రోన్నతేః క్లేశయుతా భవేయుః
ఇతీవ మత్వా ధరణీం గతోఽయమంబాస్యలక్ష్యాత్తవ పూర్ణచంద్రః || 96 ||
తవాస్యలక్ష్యాద్ధరణీం గతస్య సుధాంశుబింబస్య నిషేవణాయ
ముక్తాసరాణాం మిషతః సమాగాత్తారాతతిర్వాగ్జననీతి మన్యే || 97 ||
శారదే తవ పదం ప్రసమీక్ష్య ప్రాప్తుమస్య సదృశత్వమహో కిం
కంఠదఘ్నసలిలే ప్రతిఘస్రం పంకజాన్యురుతపః ప్రచరంతి || 98 ||
శారదే తవ పదాంబుజయుగ్మం యే స్మరంతి మనుజా భువిలోకే
శ్రీమతాం చ విదుషాం ధురి గణ్యాస్తే భవంతి న హి తత్ర విచారః || 99 ||
వాతాహతాబ్ధిలహరీతతితౌల్యభాజో
వాచః ప్రయత్నమనపేక్ష్య ముఖారవిందాత్
వాదేషు యత్కరుణయా ప్రగలంతి పుంసాం
వాగ్దేవతా భవతు వాంఛితసిద్ధయే సా || 100 ||
యస్త్వామిందునిబద్ధదివ్యమకుటాం శుక్లాంబరాలంకృతాం
ముద్రాపుస్తకమాలికామృతఘటాన్సంబిభ్రతీం ధ్యాయతి
తస్యాస్యాత్సరసా సువర్ణఘటితా సాలంకృతా వాక్తతి-
స్తూర్ణం నిఃసరతి ప్రయత్నరహితా నిఃసంశయం భారతి || 101 ||
అనాయాసాదాస్యాదమరతటినీపూరసదృశీ
తతిర్వాచామాశు ప్రసరతి శిశోరప్యనుదినం
కృపాలంబాపాంగే కృశతరవలగ్నేఽకృశకుచే
న సందేహ్యత్రాహం సరసిజభవప్రాణదయితే || 102 ||
కదాచిదపి యో నరస్తవ పదాంబుజం భక్తితో
విభావయతి శారదే హృదయపంకజే తస్య హి
వ్రజేయురపి దాసతాం నృపవరాస్తథా వాక్తతిః
సుధాశితటినీసఖీ వదనపద్మతో నిఃసరేత్ || 103 ||
జడోఽపి జగదంబికే తవ కృపాయుతం వీక్షణం
ప్రపద్య సురనాయకం జయతి సత్వరం సంపదా
ముఖాంబుజనిరర్గలప్రవిగలద్వచోవైఖరీ-
వినిర్జితసురాపగాస్మయభరశ్చ సంజాయతే || 104 ||
శివే త్వదంఘ్రిపంకజప్రణమ్రవాగ్ఝరీజితా
తుషారశైలగహ్వరం జగామ జహ్నుకన్యకా
తతస్తతోఽపి తావకప్రణమ్రకీర్తితర్జితా
శివస్య శైలకన్యకా జటాఖ్యదుర్గమావిశత్ || 105 ||
కే వా న కుర్యుర్భువి కావ్యమంబ శబ్దార్థవిజ్ఞానయుజశ్చిరాయ
చిత్రం త్వదంఘ్రిం పరిసేవతే యో జయేత్స వాచస్పతిమాశు వాగ్భిః || 106 ||
పంచాస్యషణ్ముఖచతుర్ముఖనాగరాజాః
స్తోతుం న తేఽమ్బ చరితం ప్రభవంతి కించిత్
ఏకాననః కథమహం తవ శక్నుయాం తత్
స్తోతుం తథాపి చపలం ప్రసహస్వ సూనోః || 107 ||
యావద్వాచాం సవిత్రి ప్రణతజనవచోదానబద్ధాదరే తే
పాదాంభోజం ప్రణంతుం కలయతి ధిషణాం జన్మమూకోఽపి లోకః
తావద్దేవేంద్రదత్తప్రవరమణిగణాబద్ధపీఠస్య మధ్యా-
దుత్థాయాశు ప్రధావత్యమరగురురహో మామయం జేష్యతీతి || 108 ||
ముక్తాహారమిషాజ్జగజ్జనని తే సేవాం కరోత్యాదరాత్
దేవానాం సరిదిత్యహో మకరరాడాలోచ్య సేవాం స్వయం
కర్తుం హారమిషేణ కంబుసదృశే కంఠే విభాతీతి మ-
చ్చితే భాతి పునర్వదంతు చతురాః కిం తం న జానామ్యహం || 109 ||
పాపీయానితి సంజహాసి కరుణావారాన్నిధే శారదే
సర్వాఘౌఘపయోధిబాడవశిఖే త్వం మామనాథం యది
తర్హ్యేతాదృశపాపకోటిసహితం సర్వైశ్చ దూరీకృతం
కో వా మాం పరిపాలయేత్కమలజప్రాణప్రియే బ్రూహి మే || 110 ||
భక్తిహీన ఇతి మాం జహాసి కిం మాతరద్య జలజాసనప్రియే
సంత్యజంతు భువి తర్హి మాతరస్తద్వదేవ నిజకుక్షిజాన్సుతాన్ || 111 ||
విరించిహరిశంకరప్రభృతినిర్జరాగ్ర్యార్చితే
ప్రణమ్రజడతాతమస్తతివిభేదసూర్యప్రభే
నమత్సురసతీకచప్రవిలసత్ప్రసూనస్రవ-
న్మరందతటినీప్లవత్పదసరోరుహే పాహి మాం || 112 ||
జ్వరాదినిఖిలామయాన్కరుణయా గిరామంబికే
నివారయ విభావరీపతిసమానవక్త్రాంబుజే
స్వరాదిభువనాధిపప్రణతపాదపాథోరుహే
కరాదృతసుధేఽనిశం దిశ సుఖం జనానాం ముదా || 113 ||
పద్మాసనస్థే సరసీరుహోత్థజాయే వస త్వం హృదయే సదా మే
తేనాహమాశాః సకలా జయేయం న తత్ర సందేహలవోఽస్తి మేఽమ్బ || 114 ||
యం దేవవర్యాః సముపాసతే హి తం దేహినామిష్టదమాశు మాతః
మందేతరాప్యం సుజడః కథం వా విందేయమంఘ్రిం తవ వాక్సవిత్రి || 115 ||
సమస్తవస్తూన్యపి సంతి మాతస్త్వత్సనిధౌ కిం తు న మన్మనోఽస్తి
తత్ర ప్రమాణం జనిరేవ మేఽద్య తదప్యతస్త్వం కురు సన్నిధౌ తే || 116 ||
లోకప్రసిద్ధాబ్ధితతేస్తు మానమాహుర్ద్విలక్షాధికయోజనాని
నాద్రాక్ష్మ నాశ్రౌష్మ భవత్కృపాబ్ధేర్మానం పయోజాతభవస్య జాయే || 117 ||
న పూజితా త్వం కుసుమైర్మనోజ్ఞైర్న సంస్తుతా హృద్యపదైశ్చ పద్యైః
న సంస్మృతా హృత్కమలేఽపి జాతు తథాపి మాతర్దయసే జనేఽస్మిన్ || 118 ||
నైవాహమానీయ సుమాని దివ్యాన్యారాధనం తేఽకరవం కదాపి
తథాపి మాతః సహజానుకంపాయుతైః కటాక్షైః పరిపాసి మాం త్వం || 119 || var పరిపాహి
యే ప్రాణరోధప్రముఖాన్ప్రయత్నాన్కుర్వంతి లోకాః స్వసమీహితాయ
తే నైవ జానంతి పరం ప్రణామం తవాంబ కల్పద్రుమబద్ధసఖ్యం || 120 ||
అవ్యాజకారుణ్యమయి ప్రసీద సువ్యాహృతీనాం తతిమాశు యచ్ఛ
నవ్యాని కావ్యాని కరోమి మాతః క్రవ్యాదవైరిప్రముఖామరేడ్యే || 121 ||
తిష్యే యుగే సంఘగతా హి శక్తిరితీవ సమ్యక్పరిచింత్య దేవ్యాః
నాసాసదృక్షత్వమహోఽధిగంతుం మాలాత్వమాపుః ఖలు చంపకాని || 122 ||
చంపకసుమాని మాతర్నూనం నాసాసదృక్షతాం గంతుం
సతతం మాలావ్యాజాత్సేవంతే పంకజాతభవజాయే || 123 ||
అవ జగదంబ సదా మాం సవముఖ్యకర్మభిస్తుష్టే
నవనవకవిత్వదానప్రవణే కంజాతజన్మసుకృతమయి || 124 ||
కరుణాపూరితనయనే వరుణాదిదిగీశసేవ్యపదపద్మే
అరుణాధరజితబింబే తరుణాబ్జముఖి ప్రదేహి మమ సౌఖ్యం || 125 ||
స్ఫుర జగదంబ సదా మే మానసపద్మే సరోజభవజాయే
వరదాననిరతపాణే వీణాపాణేఽధరే శోణే || 126 ||
రాకాచంద్రసదృక్షం తవ ముఖపద్మం హృదంబుజే స్మరతాం
కవితా చేటీభూయాత్తత్రాంబ, న మేఽస్తి సదేహః || 127 ||
కన్యాం కులశైలపతేర్మాన్యాం మురవైరిముఖ్యదేవతతేః
నౌకాం భవాంబురాశేర్నౌమ్యహమనిశం శశాంకశిశుశీర్షాం || 128 ||
కాంచన కాంచనగర్వన్యక్కారధురీణదేహకాంతిఝరీం
కమనీయకవనదాత్రీం కమలాసనసుకృతసంతతిం కలయే || 129 ||
తనుజితగాంగేయరుచిః కరధృతరుద్రాక్షమాలికాకుంభా
తనుతాత్తామరసాసనజాయా జాడ్యౌఘవారణం శీఘ్రం || 130 ||
మన్మూర్తినీకాశతనుం సృజాశు ప్రవిశ్య తస్యాం కురు వాసమత్ర
వ్యాఖ్యానపీఠే జగతాం సుఖాయ చిరాయ మాతర్వచసాం సవిత్రి || 131 ||
మమాస్యమధ్యాదపశబ్దయుగ్వాఙ్ న నిఃసరేద్వాణి కృపాపయోధే –
స్వప్నేఽపి లీలార్థకృతేషు జల్పేష్వపి ప్రపన్నావనబద్ధదీక్షే || 132 ||
యాం తుష్టువుః శ్రుతిశతైర్మునిసార్వభౌమాః
పాశాపనోదచతురాం పరమేష్టిపత్నీం
తాం తుచ్ఛసర్వవిషయేషు విరక్తిదాత్రీం
శ్రీశారదాం కలితచంద్రకలాం నమామి || 133 ||
యే త్వత్పదాంబుజసమర్చనలబ్ధహర్షా
రోమాంచగద్గదగిరః స్రవదక్షిపద్మాః
తే పావయంతి ధరణీం స్వపదాంజసంగా-
న్నాస్త్యత్ర కోఽపి విశయో వచసాం సవిత్రి || 134 ||
చంద్రశ్చకోరాలిమయం కరైః స్వైః కరోతి తృప్తాం సితపక్ష ఏవ
తవాస్యచంద్రస్తు నమచ్చకోరాన్ కరోతి మాతః సతతం హి తృప్తాన్ || 136 ||
ఆగచ్ఛత మత్పాదౌ ప్రణమత భజతేష్టనిఖిలసంపత్తీః
ఇతి నమ్రాంస్త్వయసి కిం ప్రసారితేనాంబ హస్తపద్మేన || 136 ||
వాణీ వీణాం హస్తపద్మే నిధాయ స్వీయం భావం దర్శయత్యంబికాసౌ
స్థిత్వా కేక్యాం భావమప్యన్యదీయం సర్వాత్మత్వద్యోతనాయేతి మన్యే || 137 ||
పీతాంబరాద్యాః సురనాయకా మే పదాగ్రనమ్రా ఇతి బోధనాయ
పాదాగ్రలంబి ప్రదధాసి మాతః పీతాంబరం కిం వద ధాతృజాయే || 138 ||
ఆదర్శమబ్జావసతిః కదాపి నాస్తీతి లోకప్రచురః ప్రవాదః
కిమన్యథాకర్తుమిమం కరోషి పాదాబ్జమాదర్శకృతప్రచారం || 139 ]]
ఆదర్శవత్స్వచ్ఛతరేషు చిత్తేష్వేవాంఘ్రిపద్మం మమ భాతి సమ్యక్
ఇత్యర్థమావేదయితుం నతానామాదర్శవృత్తిం ప్రకరోషి పాదం || 140 ||
సకృత్ప్రణంతౄనపి భక్తలోకాననేకధా కిం ప్రణతాన్విభావ్య
తదానుగుణ్యేన ఫలాని దాతుమాదర్శమంఘ్రేః సవిధే దధాసి || 141 ||
లబ్ధప్రతిష్ఠః పరిపూర్ణచంద్రే కరోమి వాసం కథమర్ధచంద్రే
ఏవం కలంకః పరిచింత్య నీలరత్నాపదేశాత్కిము భాతి శీర్షే || 142 ||
కమలాసనస్య పత్యుర్ధ్యానాత్సతతం పతివ్రతే కిమిదం
కమలాసనత్వమాగాః స్వయమపి వాచాం సవిత్రి మే బ్రూహి || 143 ||
సతాం హృదబ్జేషు వసామ్యజస్రమిత్యర్థమావేదయితుం జనానాం
పద్మే నివాసం ప్రకరోషి మాతః కి పద్మయోనేర్దయితే వదాస్మై || 144 ||
హస్తేనాదాయ శీఘ్రం నతహృదయసరోజాతమీశే గిరాం కిం
చాంచల్యం తత్ర దృష్ట్వా బహులమథ నిజం హ్యాసనత్వం ప్రకల్ప్య
అధ్యాస్తే స్థైర్యసిద్ధ్యై పరమిహ భవతీ భర్తృయుక్తా హ్యజస్రం
మాతుః పుత్రేషు పూర్ణా ప్రభవతి కరుణా హేతుశూన్యైవ వాణి || 145 ||
రథస్థితాం మాం మనుజా జగత్యా పశ్యంతి యే భక్తియుతాంతరంగాః
మనోరథావాప్తిరశేషతః స్యాత్తేషామితి ద్యోతయితుం రథస్థా || 146 ||
పద్మాసనస్థితౌ మమ పదయోః స్ఫుటతా భవేన్నైవ
నమ్రజనానామితి కిం తిష్ఠసి పాదౌ వివృణ్వానా || 147 ||
ఉపవిష్టాయాస్తంద్రీ కదాచిదపి మే నతావనే ప్రభవేత్
ఇతి తిష్ఠసి కిము నమ్రాంస్తంద్రాహీనావితుం గిరాం దేవి || 148 ||
మత్పాదాంబుజసేవకానతిజవాత్సంసారవారాన్నిధే-
రాకృష్యోద్ధరణం విధేయమధునేత్యుత్థాయ పద్మాసనాత్
యో వా కశ్చిదిహేత్య జన్మజలధౌ మగ్నోఽహమస్మీత్యతో
మాం రక్షేతి సమాహ్వయేదితి ముదా తిష్ఠస్యహో వాణి కిం || 149 ||
ఆకర్షతి యథాయాంసి హ్యయస్కాంతమణిర్ద్రుతం
తథైవ త్వన్ముఖాంభోజం నతచిత్తాని శారదే || 150 ||
ధాతుః పుణ్యతతిః కాచిద్వాచాం ధాటీం దదాతు మే
యాం దృష్ట్వా లజ్జితో భూయాత్సురాచార్యోఽపి తాదృశీం || 151 ||
కటాక్షజితనీలాబ్జా కరికుంభనిభస్తనీ
కరోతు మమ కల్యాణం కమలాసనకామినీ || 152 ||
కంజభవపుణ్యరాశే కమ్రస్మితజితచకోరబంధుచయే
కంసమదమర్దనచణే కంచన పురుషార్థమర్థయన్నౌమి || 153 ||
మతిజితసురగురుగర్వాన్ ప్రకుర్వతీం శీఘ్రమేవ పదనమ్రాన్
కలయే హృది జగదంబాం కరపద్మలసత్సుధాకుంభాం || 154 ||
ఉన్నమ్యోన్నమ్య సంధ్యాదిచంద్రరాజతపాత్రకం
యామినీకామినీ తారాకుసుమాని చినోతి కిం || 155 ||
తీరాత్తీరం చరంతీ కమలజదయితా పోతవర్యేణ మోదా-
త్కారుణ్యాక్రాంతచేతా నతనరనికరం బోధయత్యేనమర్థం
సంసారాపారసింధుం మమ పదసరసీజాతవిన్యస్తబుద్ధీన్
భక్త్యాఖ్యేనోడుపేన ద్రుతమిహ మనుజాంస్తారయామీతి నూనం || 156 ||
వనజాసనవరమానిని సమ్యక్కర్తుం కిమాసనం పత్యుః
వనజాని పత్రపుష్పాణ్యానయసే కక్షపాణిపద్మైస్త్వం || 157 ||
గ్రామీణపుష్పవృందం దృష్ట్వా దృష్ట్వానుఘస్రమంబ కిము
వనజాని పుష్పవర్యాణ్యానయసే కింవిధానీతి || 158 ||
అవనరతాయాః కిము మమ పదే పదే నైవ భవతి వనగమనం
ఇత్యేకదైవ వనజాన్యానయసే కక్షమధ్యేన || 159 ||
దండధృద్భయనివారణేచ్ఛుభిర్దంభమోహముఖదోషవర్జితైః
దండితేద్రియచయైర్నిషేవితే దంతితుల్యగమనేఽవ శారదే || 160 ||
వాచామీశః ప్రభవతి యదాలోకమాత్రాజ్జడాగ్ర్యో
నాకాధీశః ప్రభవతి తథా రంకవర్యోఽపి లోకే
తచ్చంద్రాబ్జప్రముఖనిబిడాహంకృతేర్భేదదక్షం
నిత్యం వక్త్రం హృదయకుహరే భావయామి త్వదీయం || 161 ||
అతిచపలం మమ హృదయం తవ రూపం చాతిసూక్ష్మమితి నిగమాః
కథమంబ మామకీనం మన ఏతద్వేత్తు తావకం రూపం || 162 ||
ఐంకారస్తవ బీజం వదనే మమ వసతు సర్వదా వాణి
తేనాహం సకలార్థాన్క్షిప్రం సంసాధయామి నో విశయః || 163 ||
ఇతి శృంగేరి శ్రీజగద్గురు శ్రీ సచ్చిదానంద శివాభి నవనృసింహ భారతీ స్వామిభిః
విరచితం శ్రీ శారదా స్తోత్రం సంపూర్ణం.
Also Read :
