Sri Sharada Sata Shloki Stava | శ్రీ శారదా శత శ్లోకీ స్తవ

చంపకసుమకోరకయుక్చకితమృగీప్రేక్షణేన సంయుక్తం 

శుకకేకినినదజుష్టం వనమివ తవ భాతి వదనాబ్జం   || 4  ||

నాసికాఖ్యవరశాఖయా యుతం ఖంజరీటఖగయుగ్మభూషితం 

పక్వబింబఫలసంయుతం శివే భాతి భూరుహ ఇవాననం తవ   || 5  ||

భక్తకేకికులతోషణవ్రతం పద్మసంభవహృదంబరాశ్రితం 

గద్యపద్యమయవారిసందదన్మేఘవత్తవ ముఖం విభాతి మే   || 6  ||

నేత్రోత్పలాలంకృతమధ్యభాగం భ్రూవల్లికాబంభరపంక్తిరమ్యం 

పక్ష్మాలిశైవాలయుతం విభాతి తవాస్యమేతత్సరసీవ వాణి   || 7  ||

సుచిల్లికాతోరణశోభమానం విశాలఫాలాంగణరమ్యరమ్యం 

ఉత్తుంగమాణిక్యకిరీటహర్మ్యం విభాతి వేశ్మేవ తవాంబ వక్త్రం   || 8  ||

శారదే తవ పదాంబుజయుగ్మం బోధపుష్పరసపూర్ణమజస్రం 

మామకం హృదయసంజ్ఞకమీశే నైవ ముంచతు సరః కరుణాబ్ధే   || 14  ||

కథితాని మదీప్సితాని మాతర్ముహురగ్రే తవ శారదాంబికే త్వం 

న హి పూరయసే చిరాయసే కిం మదఘౌఘాత్కిము శక్త్యభావతో వా   || 15  ||

అద్యైవ మత్ప్రార్థితమంబ దద్యా యది త్వపారాం కరుణాం విధాయ 

వేలావిహీనం సుఖమాప్నుయాం హి నైవాత్ర సందేహలవోఽపి కశ్చిత్   || 16  ||

కమనీయకవిత్వదాం జవాద్రమణీయాంబుజతుల్యపద్యుతాం 

శమనీయభయాపహారిణీం రమణీం పద్మభవస్య భావయే   || 17  ||

కాంక్షే కమలజకామిని కమనీయైః పద్యనికురుంబైః 

స్తోతుం వాచాం నికరం స్వాయత్తం కలయ జగదంబ   || 18  ||

కామం మమ ఫాలతలే లిఖతు లిపిం దుఃఖదాం విధిః సతతం 

నాహం బిభేమి మాతర్లుంపామి త్వత్పదాబ్జరజసా తాం   || 19  ||

కిం కల్పవృక్షముఖ్యైః కిం కరధృతమేరుణా శివేనాపి 

కిం కమలయా చ హృది చేత్కింకరసర్వేష్టదా వాణీ   || 20  ||

తుంగాతటనికటచరం భృంగావలిగర్వహరణచణచికురం 

శ్రీశారదాభిధానం భాగ్యం మమ జయతి శృంగశైలాగ్రే   || 21  ||

నిరణాయి మయా సమస్తశాస్త్రాణ్యపి

వీక్ష్య ప్రణతార్తిహారి లోకే 

ప్రవిహాయ తవాంఘ్రిపంకజాతం

న పరం వస్త్వితి వాణి నిశ్చితం తత్   || 22  ||

పద్మాసనాసి ఖలు భారతి వాగధీశే

పద్మాసనప్రియతమే కరలగ్నపద్మే 

మత్కం మనోఽమ్బుజమహో స్వయమేవ మాతః

శ్రీశారదాంబ విజహాసి కిమత్ర వాచ్యం   || 23  ||

ఆనీయ దివ్యకుసుమాని కిరంతి లోకా

యే త్వత్పదాబ్జయుగలం వచసాం సవిత్రి 

తాన్ప్రాప్తరాజపదవీంస్తరసా కిరంతి

పౌరాంగనాః కుసుమలాజచయేన నూనం   || 24  ||

ఆజ్ఞాసీద్గౌరవీ మే తవ ఖలు కరుణావారిధిః శారదాంబా

సాష్టాంగం యోగమారాదుపదిశతి భవానౌరసః సూనురస్యాః 

ఇత్యప్యద్యాపి మాతర్న హి ఖలు కరుణా జాయతే మయ్యనాథే

కిం వా కుర్యాం వదాంబ ప్రణతభయహరే శారదే చాపలోఽహం   || 25  ||

నాహం నిగృహ్య కరణాని సరోజజాతజాయే 

త్వదీయపదపంకజయోర్హి సేవాం 

శక్నోమి కర్తుమలసాజ్ఞశిఖామణిర్యత్తస్మాన్ని

సర్గకరుణాం కురు మయ్యనాథే   || 26  ||

వాణి సరస్వతి భారతి వాగ్వాదిని వారిజాతజనిజాయే 

కాశ్మీరపురనివాసిని కామితఫలవృందదాయిని నమస్తే   || 27  ||

శరణం త్వచ్చరణం మే నాన్యద్వాగ్దేవి నిశ్చితం త్వేతత్ 

తస్మాత్కురు కరుణాం మయ్యనన్యశరణే ద్రుతం మాతః   || 28  ||

శరదభ్రసదభ్రవస్త్రవీతా కరదూరీకృతపంకజాభిమానా 

చరణాంబుజలగ్ననాకిమౌలిర్వరదా స్యాన్మమ శారదా దయార్ద్రా   || 29  ||

స్థాపయ నరకేషు సదాప్యథ సుఖకాష్ఠాసు దివ్యలోకేషు 

న హి తత్ర మే విచారః పరం తు చిత్తం తవాంఘ్రిగతమస్తు   || 30  ||

శృంగాద్రివాసలోలే భృంగాహంకారహారికచభారే 

తుంగాతీరవిహారే గంగాధరసోదరి ప్రసీద మమ   || 31  ||

ఋష్యశృంగజనిభూమివిభూషే కశ్యపాదిమునివందితపాదే 

పశ్యదంఘ్రిముఖపాలనలోలే వశ్యపంకజభవేఽవ సదా మాం   || 32  ||

కంబుడంబరనివర్తకకంఠామంబుధిం నిరవధి కరుణయాః 

అంబుదప్రతిమకేశసమూహామంబుజోద్భవసఖీం కలయేఽహం   || 33  ||

భర్మగర్వహరసంహననాభాం శర్మదాం పదసరోజనతేభ్యః 

కర్మభక్తిముఖపద్ధతిగమ్యాం కుర్మహే మనసి పద్మజజాయాం   || 34  ||

శంభుసోదరి శశాంకనిభాస్యే మందబుద్ధివితతేరపి శీఘ్రం 

వాక్ప్రదాయిని కృపామృతరాశే శృంగశైలవరవాసవిలోలే   || 35  ||

తుష్టిమేహి వచసాం జనని త్వం మత్కృతేన విధినాఽవిధినా వా 

ఐంజపేన పరిపూరయ వాంఛాం మామకీం చ మహతీమపి శీఘ్రం   || 36  ||

తవౌరసం సూనుమహో త్వదీయభక్తాగ్రగణ్యా మమ దేశికేంద్రాః 

ప్రాహుర్యతోఽతో మయి శారదాంబ పాప్యగ్రగణ్యేఽపి దయా విధేయా   || 37  ||

తవౌరసం మాం సుతమాహురార్యాస్త్వత్పాదభక్తాగ్రసరా యతోఽతః 

సోఢ్వా మదీయాన్సకలాపరాధాన్పురో భవాంబాశు గిరాం సవిత్రి   || 38  ||

భక్తేష్టపాథోనిధిపూర్ణచంద్రః కవిత్వమాకందవసంతకాలః 

జాడ్యాంధకారవ్రజపద్మబంధురంబ ప్రణామస్తవ పాదపద్మే   || 39  ||

ముఖాంబుజం భాతు జగజ్జనన్యా హృదంబుజే మే జితచంద్రబింబం 

రదాంబరాధఃకృతపక్వబింబం మహాఘవిధ్వంసనచంచ్వజస్రం   || 40  ||

యానేన హంసం వదనేన చంద్రం శ్రోణీభరాచ్ఛైలపతిం చ కామం 

కాంచిద్ధసంతీం కలయే హృదబ్జే చంద్రార్ధరాజద్వరకేశపాశాం   || 41  ||

విస్మృత్య దేహాదికమంబ సమ్యక్సముచ్చరంస్తావకమంత్రరాజం 

తుంగానదీపుణ్యతటే కదాహం సుసైకతే స్వైరగతిర్భవామి   || 42  ||

శ్రీశాదిసంసేవితపాదపద్మే శ్రీబోధదానవ్రతబద్ధదీక్షే 

శ్రీకంఠసోదర్యమితానుకంపే శ్రీశారదాంబాశు కృపాం కురుష్వ   || 43  ||

హృద్యాని పద్యాని వినిఃసరంతి త్వదంఘ్రిసంపూజకవక్త్రపద్మాత్ 

వినా ప్రయత్నం తరసా న చిత్రం త్వమంబ యస్మాద్వచసాం సవిత్రీ   || 44  ||

గమాగమవివర్జితైరసుభిరంతరంగేఽనిశం

గజాస్యగుహనందిభిః సురవరైర్ముదా చింతితే 

గజాజినధరానుజే గలితతృష్ణలోకేక్షితే

గతిం మమ శుభాం మతిం సపది దేహి వాగీశ్వరి   || 45  ||

జలోద్భవజభామిని ప్రణతసౌఖ్యభూమప్రదే

జడత్వవినివారణవ్రతనిషక్తచేతోఽమ్బుజే 

జగత్త్రయనివాసిభిః సతతసేవ్యపాదాంబుజే

జగజ్జనని శారదే జనయ సౌఖ్యమత్యద్భుతం   || 46  ||

మదేభగమనేఽవనే నతతతేరనేకైః సుఖై-

రనారతమజామితం ప్రవణహృత్సరోజేఽమ్బికే 

కుతో మయి కృపా న తే ప్రసరతి ప్రసన్నే వద

ప్రపంచజననప్రభుప్రణయిని ప్రపద్యేఽద్య కం   || 47  ||

కదా వా శ్రుంగాద్రౌ విమలతరతుంగాపరిసరే

వసన్మాతర్వాచాం శిరసి నిదధానోఽఞ్జలిపుటం 

గిరాం దేవి బ్రాహ్మి ప్రణతవరదే భారతి జవా-

త్ప్రసీదేతి క్రోశన్నిమిషమివ నేష్యామి దివసాన్   || 48  ||

జగన్నాథం గంగా వివిధవృజినోఘైః పరివృతం

యథాఽరక్షత్పూర్వం సకలమపి హత్వాఽఽశు దురితం 

పునశ్చాంతే దత్త్వా కరసరసిజం పూర్ణకృపయా

జనైః సద్భిః ప్రాప్యాం పరమపదవీం ప్రాపితవతీ   || 49  ||

తథా శాంతం పాపం సకలమపి కృత్వా మమ జవాద్ధృదంభోజే

లగ్నం కురు తవ పదాంభోరుహయుగం 

కరాంభోజే పశ్చాత్పరమకృపయా దేవి వచసాం

ప్రదత్త్వాఽఽలంబం మాం గమయ పదవీం నిర్మలతరాం   || 50  ||

దవీయాంసం త్వేనం పరమకృపయా 

దేశికముఖాత్సమానీయాంబ త్వం తవ పదపయోజాతనికటం 

అవిత్వాఽఽపీయంతం సమయమధునా దేవి భజసే

యదౌదాస్యం తర్హి త్రిజగతి మమాన్యాం వద గతిం   || 51  ||

కామం సంతు సురా నిరంతరనిజధ్యానార్చనాకారిణో

లోకాన్స్వేప్సితసర్వసౌఖ్యసహితాన్కర్తుం జగత్యాం కిల 

పూజాధ్యానజపాదిగంధరహితాంస్త్రాతుం పునస్త్వాం వినా

నాన్యద్దైవతమస్తిపద్మజమనఃపద్మార్భకార్కప్రభే   || 52  ||

కారుణ్యం మయి ధేహి మాతరనిశం పద్మోద్భవప్రేయసి

ప్రారబ్ధం మమ దుష్టమాశు శమయ ప్రజ్ఞాం శుభాం యచ్ఛ మే 

కర్తుం  కావ్యచయం రసౌఘభరితం శక్తిం దృఢాం భక్తిమ-

ప్యంహఃసంచయవారిణీం తవ పదాంభోజే కృపాంభోనిధే   || 53  ||

కుర్యామద్య కిమంబ భక్తిరహితః పూజాం జపం తర్పణం

కిం వైరాగ్యవివేకగంధరహితః కుర్యాం విచారం శ్రుతేః 

కిం యోగం ప్రకరోమి చంచలమనాః శృంగాద్రివాసప్రియే

త్వత్పాదప్రణతిం విహాయ న గతిర్మేఽన్యా గిరాం దేవతే   || 54  ||

జహ్యాన్నైవ కదాపి తావకపదం  మాతర్మనో మామకం

మాంద్యధ్వాంతనివారణోద్యతదినేశాఖర్వగర్వావలి 

గౌరీనాథరమాధవాబ్జభవనైః సంభావ్యమానం ముదా

వాక్చాతుర్యవిధానలబ్ధసుయశఃసంపూరితాశాముఖం   || 55  ||

తుంగాతీరవిహారసక్తహృదయే శృంగారజన్మావనే

గంగాధారిముఖామరేంద్రవినుతేఽనంగాహితాపద్ధరే 

సంగాతీతమనోవిహారరసికే గంగాతరంగాయితా

భృంగాహంకృతిభేదదక్షచికురే తుంగాగిరో దేహి మే   || 56  ||

త్వత్పాదాంబుజపూజనాప్తహృదయాంభోజాతశుద్ధిర్జనః

స్వర్గం రౌరవమేవ వేత్తి కమలానాథాస్పదం దుఃఖదం 

కారాగారమవైతి చంద్రనగరం వాగ్దేవి కిం వర్ణనైర్దృశ్యం

సర్వముదీక్షతే స హి పునా రజ్జూరగాద్యైః సమం   || 57  ||

త్వత్పాదాంబురుహం విహాయ శరణం నాస్త్యేవ మేఽన్యద్ధ్రువం

వాచాం దేవి కృపాపయోజలనిధే కుత్రాపి వా స్థాపయ 

అప్యూర్ధ్వం ధ్రువమండలాదథ ఫణీంద్రాదప్యధస్తత్ర మే

త్వన్న్యస్తైహికపారలౌకికభరస్త్వాసే న కాపి వ్యథా   || 58  ||

త్వత్పాదాంబురుహం హృదాఖ్యసరసిస్యాద్రూఢమూలం యదా

వక్త్రాబ్జే త్వమివాంబ పద్మనిలయా తిష్ఠేద్గృహే నిశ్చలా 

కీర్తిర్యాస్యతి దిక్తటానపి నృపైః సంపూజ్యతా స్యాత్తదా

వాదే సర్వనయేష్వపి ప్రతిభటాందూరీకరోత్యేవ హి   || 59  ||

మాతస్త్వత్పదవైభవం నిగదితుం ప్రారభ్య నాగేశ్వరా-

స్వప్నాచార్యకవీందుశేఖరదినేశాద్యాః ప్రభగ్నా ముహుః 

క్వాహం తత్కథనే జడేష్వచరమః కారుణ్యపాథోనిధే

వాచాం దేవి సుతస్య సాహసమిదం క్షంతవ్యమేవాంబయా   || 60  ||

మాతః శృంగపురీనివాసరసికే మాతంగకుంభస్తని

ప్రాణాయామముఖైర్వినాపి మనసః స్థైర్యం ద్రుతం దేహి మే 

యేనాహం సుఖమన్యదుర్లభమహోరాత్రం భజామ్యన్వహం

ప్రాప్స్యామ్యాత్మపరైకబోధమచలం నిఃసంశయం శారదే   || 61  ||

వేదాభ్యాసజడోఽపి యత్కరసరోజాతగ్రహాత్పద్మభూశ్చిత్రం

విశ్వమిదం తనోతి వివిధం వీతక్రియం సక్రియం 

తాం తుంగాతటవాససక్తహృదయాం శ్రీచక్రరాజాలయాం

శ్రీమచ్ఛంకరదేశికేంద్రవినుతాం శ్రీశారదాంబాం భజే   || 62  ||

వైరాగ్యం దృఢమంబ దేహి విషయేష్వాద్యంత

దుఃఖప్రదేష్వామ్నాయాంతవిచారణే స్తిరతరాం చాస్థాం కృపావారిధే 

ప్రత్యగ్బ్రహ్మణి చిత్తసంస్థితివిధిం సంబోధయాశ్వేవ మాం

త్వం బ్రూషే సకలం మమేతి గురవః ప్రాహుర్యతః శారదే   || 63  ||

కమలాసనవరకామిని కరధృతచిన్ముద్రికే కృపాంభోధే 

కరకలితామలకాభం తత్త్వం మాం బోధయతు జగదంబ   || 64  ||

కరవిధృతకీరడింభాం శరదభ్రసధర్మవస్త్రసంవీతాం 

వరదాననిరతపాణిం  సురదాం ప్రణమామి శారదాం సదయాం   || 65  ||

కామాక్షీవిపులాక్షీమీనాక్షీత్యాదినామభిర్మాతః 

కాంచీకాశీమధురాపురేషు భాసి త్వమేవ వాగ్జనని   || 66  ||

చంద్రార్ధశేఖరాపరరూపశ్రీశంకరార్యకరపూజ్యే 

చంద్రార్ధకృతవతంసే చందనదిగ్ధే నమామి వాణి పదే   || 67  ||

జయ జయ చిన్ముద్రకరే జయ జయ శృంగాద్రివిహరణవ్యగ్రే 

జయ జయ పద్మజజాయే జయ జయ జగదంబ శారదే సదయే   || 68  ||

దుర్వసనదత్తశాపప్రతిపాలనలక్ష్యతః సమస్తానాం 

రక్షార్థమవనిమధ్యే కృతచిరవాసాం నమామి వాగ్దేవీం   || 69  ||

నవనవకవనసమర్థం పటుతరవాగ్ధూతవాసవాచార్యం 

వనజాసనవరమానిని వరదే కురు శీఘ్రమంఘ్రినతం   || 70  ||

భగవత్పదమండనయోర్వాదమహే సకలలోకచిత్రకరే 

అంగీకృతమాధ్యస్థ్యాం జగదంబాం నౌమి శారదాం సదయాం   || 71  ||

సేవాపూజానమనవిధయః సంతు దూరే నితాంతం

కాదాచిత్కా స్మృతిరపి పదాంభోజయుగ్మస్య తేఽమ్బ 

మూకం రంకం కలయతి సురాచార్యమింద్రం చ వాచా

లక్ష్మ్యా లోకో న చ కలయతే తాం కలేః కిం హి దౌఃస్థ్యం   || 72  ||

ఆశావస్త్రః సదాత్మన్యవిరతహృదయస్త్యక్తసర్వానురాగః

కాయే చక్షుర్ముఖేష్వప్యనుదితమమతః క్వాపి కస్మింశ్చ కాలే 

శైలాగ్రేఽరణ్యకోణే క్వచిదపి పులినే క్వాపి రేవాతటే వా

గంగాతీరేఽథ తుంగాతటభువి చ కదా స్వైరచారీ భవేయం   || 73  ||

కల్పంతాం కామ్యసిద్ధ్యై కలిమలహతయే చాక్షయైశ్వర్యసిద్ధ్యై

కారుణ్యాపారపూరాః కమలభవమనోమోదదానవ్రతాఢ్యాః

కాత్యాయన్యబ్ధికన్యాముఖసురరమణీకాంక్ష్యమాణాః కవిత్వ-

ప్రాగ్భారాంభోధిరాకాహిమకరకిరణాః శారదాంబాకటాక్షాః   || 74  ||

కల్పాదౌ తన్మహిమ్నా కతిపయదివసేష్వేవ లుప్తేషు మార్గే-

ష్వామ్నాయప్రోదితేషు ప్రవరసురగణైః ప్రార్థితః పార్వతీశః 

ఆమ్నాయాధ్వప్రవృద్ధ్యై యతివరవపుషాగత్య యాం శృంగశైలే

సంస్థాప్యార్చాం ప్రచక్రే నివసతు వదనే శారదా సాదరం సా   || 75  ||

తిష్ఠామ్యత్రైవ మాతస్తవ పదయుగలం వీక్షమాణః ప్రమోదా-

న్నాహం త్యక్త్వా తవాంఘ్రిం సకలసుఖకరం క్వాపి గచ్ఛామి నూనం 

ఛాయాం మత్కాం విధత్స్వ ప్రవచననమనధ్యానపూజాసు శక్తాం

శుద్ధామేకాం త్రిలోకీజననపటువిధిప్రాణకాంతే నమస్తే   || 76  ||

త్వద్బీజే వర్తమానే వదనసరసిజే దుర్లభం కిం నరాణాం

ధర్మో వాఽర్థశ్చ కామోఽప్యథ చ సకలసంత్యాగసాధ్యశ్చ మోక్షః 

కామ్యం వా సార్వభౌమ్యం కమలజదయితేఽహేతుకారుణ్యపూర్ణే

శృంగాద్ర్యావాసలోలే భవతి సురవరారాధ్యపాదారవిందే   || 77  ||

దృష్ట్వా త్వత్పాదపంకేరుహనమనవిధావుద్యతాన్భక్త

లోకాన్దూరం గచ్ఛంతి రోగా హరిమివ హరిణా వీక్ష్య యద్వత్సుదూరం 

కాలః కుత్రాపి లీనో భవతి దినకరే ప్రోద్యమానే తమోవత్సౌఖ్యం 

చాయుర్యథాబ్జం వికసతి వచసాం దేవి శృంగాద్రివాసే   || 78  ||

నాహం త్వత్పాదపూజామిహ గురుచరణారాధనం చాప్యకార్షం

నాశ్రౌషం తత్త్వశాస్త్రం న చ ఖలు మనసః స్థైర్యలేశోఽపి కశ్చిత్ 

నో వైరాగ్యం వివేకో న చ మమ సుదృఢా మోక్షకాంక్షాఽపి నూనం

మాతః కావా గతిర్మే సరసిజభవనప్రాణకాంతే న జానే   || 79  ||

నౌమి త్వాం శైవవర్యాః శివ ఇతి గణనాథార్చకా విఘ్నహర్తే-

త్యార్యేత్యంబాంఘ్రిసక్తా హరిభజనరతా విష్ణురిత్యామనంతి 

యాం తాం సర్వస్వరూపాం సకలమునిమనఃపద్మసంచారశీలాం

శృంగాద్ర్యావాసలోలాం కమలజమహిషీం శారదాం పారదాభాం   || 80  ||

యః కశ్చిద్బుద్ధిహీనోఽప్యవిదితనమనధ్యానపూజావిధానః

కుర్యాద్యద్యంబ సేవాం తవ పదసరసీజాతసేవారతస్య 

చిత్రం తస్యాస్యమధ్యాత్ప్రసరతి కవితా వాహినీవామరాణాం

సాలంకారా సువర్ణా సరసపదయుతా యత్నలేశం వినైవ   || 81  ||

యాచంతే నమ్రలోకా వివిధగురురుజాక్రాంతదేహాః

పిశాచైరావిష్టాంగాశ్చ తత్తజ్జనితబహుతరక్లేశనాశాయ శీఘ్రం 

కిం కుర్యాం మంత్రయంత్రప్రముఖవిధిపరిజ్ఞానశూన్యశ్చికిత్సాం

కర్తుం న త్వత్పదాబ్జస్మరణలవమృతే వాణి జానేఽత్ర కించిత్   || 82  ||

రాగద్వేషాదిదోషైః సతతవిరహితైః శాంతిదాంత్యాదియుక్తై-

రాచార్యాంఘ్ర్యబ్జసేవాకరణపటుతరైర్లభ్యపాదారవిందా 

ముద్రాస్రక్కుంభవిద్యాః కరసలిలరుహైః సందధానా పురస్తాదాస్తాం

వాగ్దేవతా నః కలికృతవివిధాపత్తివిధ్వంసనాయ   || 83  ||

వారయ పాపకదంబం తారయ సంసారసాగరం తరసా 

శోధయ చిత్తసరోజం బోధయ పరతత్త్వమాశు మామంబ   || 84  ||

సచ్చిద్రూపాత్మనిష్ఠః ప్రగలితసకలాక్షాదివృత్తిః శయానో

భుంజానః సత్యసౌఖ్యం తదితరసుఖతః ప్రాప్తనీరాగభావః 

పాషాణే వాథ తల్పే వనభువి సదనే పార్థివస్యాఽశ్మహేమ్నోర్నార్యాం

మృత్యౌ చ తుల్యః సతతసుఖిమనాః స్యాం కదా శారదాంబ   || 85  ||

కిం పాఠయేయం లఘుచంద్రికాం వా కిం వా త్యజేయం సకలప్రపంచం 

స్వప్నేఽద్య మే బ్రూహి కిమత్ర కార్యం డోలాయితం మామకమంబ చేతః   || 86  ||

త్యాగే వాఽధ్యాపనే వా మమ ఖలు న గిరాం దేవి కాప్యస్తి శక్తిస్త్వం

వై సర్వత్ర హేతుర్యదసి నిరవధిర్వారిరాశిః కృపాయాః 

తస్మాత్స్వప్నేఽద్య కార్యం మమ ఖలు నిఖిలం బోధయైవం 

కురుష్వేత్యజ్ఞానాం బోధనార్థం త్వమిహ బహువిధా అంబ మూర్తీర్బిభర్షి   || 87  ||

వితర విధిప్రేయసి మే విమలధియం వాంఛితం చ తరసైవ 

విష్ణుముఖామరవంద్యే విధుబింబసమానవదనకంజాతే   || 88  ||

శారదనీరదసన్నిభవసనే వనజాసనాంతరంగచరే 

వరటావల్లభయానే వరదే వాగ్దేవి శారదే పాహి   || 89  ||

సప్తదశఘస్రమవిరతమీశేన సమస్తవిద్యానాం 

విరచితవాదాం కుతుకాత్సామోదం నౌమి వాగ్జననీం   || 90  ||

సురవరనిషేవ్యపాదే సుఖలవాధూతకేకికులనినదే

సురవనవిహారబలదే సురవరదే పాహి శారదే సురదే   || 91  ||

కుందరదనేఽమ్బ వాణి ముకుందరవీంద్వాదిదేవవర్యేడ్యే 

కుందరకృపావశాన్ముకుందవరాద్యాంశ్చ మే నిధీందేహి   || 92  ||

స్ఫురశరదిందుప్రతిభటవదనే వాగ్దేవి మామకే మనసి 

వరదాననిరతపాణే సరసిజనయనే సరోజజాతసఖి   || 93  ||

అస్థిరభక్తేర్మమ దేవి గిరాం శీఘ్రం దత్త్వా కాంచిత్సిద్ధిం 

కురు సుదృఢాం మమ తవ పాదాబ్జే భక్తిం శృంగగిరీంద్రనివాసే   || 94  ||

సహమానసోదరి సహ ప్రణ్తకృతా మానహీనమంతుతతీః 

సహమానసోదరీత్వం త్యజ వా యుక్తం యదత్ర కురు వాణి   || 95  ||

వలభిన్ముఖనిర్జరవరసేవ్యే కలవచనన్యక్కృతపికరావే 

జలజప్రతిభటపదయుగరమ్యే కలయ ప్రవరం కృతినామేనం   || 96  ||

కరవిలసద్వరపుస్తకమాలే శరదబ్జాహంకృతిహరచేలే 

అరణీసుమనిభకుంకుమఫాలే శరణం మమ భవ ధృతశుకబాలే   || 97  ||

కలయాసక్తిం కమలజదయితే తులనాశూన్యామీమ్మనువర్యే 

వలయాంచితకరసరసీజాతే లలనాభిః సురవితతేః పూజ్యే   || 98  ||

శృంగక్ష్మాభృత్కూటవిహారే తుంగాతటభూకృతసంచారే 

వాచాం దేవి ప్రార్థితమర్థం శీఘ్రం దేహి ప్రణతాయాస్మై   || 99  ||

నాహం సోఢుం కాలవిలంబం శక్నోమ్యంబ ప్రణతప్రవణే 

ఈప్సితమర్థం దేహి తదాశు ద్రుహిణస్వాంతాంబుజబాలఘృణే   || 100  ||

ఇతి శృంగేరి శ్రీజగద్గురు శ్రీ సచ్చిదానంద శివాభినవ నృసింహ భారతీ స్వామిభిః 

విరచితః శ్రీ శారదా శతశ్లోకీ స్తవః సంపూర్ణః.