Sri Sharadamba Stotra Malika | శ్రీ శారదాంబా స్తోత్ర మాలికా

ఆసేతుశీతగిరిమధ్యనివాసలోకాన్

స్వస్వాశ్రమాద్యుచితకర్మనిషక్తచిత్తాన్   |

శ్రీఘ్రం విధాయ కరుణామృతవారిరాశే

శ్రీశారదాంబ సితచిత్తమిమం కురుష్వ   || 1  ||

హంసాదిమస్కరివరార్చితపాదపద్మే

హంసాగ్ర్యయాననిరతే ముఖనిర్జితాబ్జే   |

కంసారిముఖ్యసురనాయకపూజ్యమానే

శ్రీశారదాంబ సితచిత్తమిమం కురుష్వ   || 2  ||

శ్వేతాంబుసంభవనివాసనిషక్తబుద్ధే

శీతాంశురాజతమహీధరతుల్యవర్ణే   |

వాతాంబుమాత్రపరితుష్టజనాలిసేవ్యే

శ్రీశారదాంబ సితచిత్తమిమం కురుష్వ   || 3  ||

క్రవ్యాదవైరిముఖదేవవరేడ్యపాదే

సువ్యాహృతిప్రదపదాంబుజజాతుపాతే   |

నిర్వ్యాజపూర్ణకరుణామృతజన్మభూమే

శ్రీశారదాంబ సితచిత్తమిమం కురుష్వ   || 4  ||

భక్త్యాదిగంధరహితాన్గురుపాదపద్మే

తత్సేవనే చ సుతరాం వినివృత్తభావాన్   |

లోకానవాంబ పరిశుద్ధహృదో విధాయ

శ్రీశారదాంబ సితచిత్తమిమం కురుష్వ   || 5  ||

అజ్ఞాతవేదనిచయస్మృతిముఖ్యగంధాన్

కామార్థమాత్రపురుషార్థధియో మనుష్యాన్   |

ఆమ్నాయమార్గపథికాంస్తరసా విధాయ

శ్రీశారదాంబ సితచిత్తమిమం కురుష్వ   || 6  ||

దేహాత్మవాదనిరతాన్సతతం హి మోదా-

త్తత్పాలనైకనిరతానపి నీచవృత్త్యా   |

కిం చ స్వవృత్తివిముఖాన్పరిపాలయంతీ

శ్రీశారదాంబ సితచిత్తమిమం కురుష్వ   || 7  ||

పాపాంబురాశివినిమజ్జనముహ్యమాన-

మేనం దురంతవిషయాశమజాస్యవాసే   |

లోకం నివార్య తరసా కృపయా దురాశాం

శ్రీశారదాంబ సితచిత్తమిమం కురుష్వ   || 8  ||

ఉద్వేగకాలపరితుష్టహృదంబుజాత-

మప్యైహికాదినిచయే స్పృహయా విహీనం   |

భీత్యా రుషా చ సుతరాం రహితం విధాయ

శ్రీశారదాంబ సితచిత్తమిమం కురుష్వ   || 9  ||

ఆకల్పకాలటినివాసనిబద్ధదీక్షా

భూత్వా తథాఖిలజగత్యపి ధర్మవృద్ధిం   |

ప్రాపయ్య లోకపరిరక్షణమాచరంతీ

శ్రీశారదాంబ సితచిత్తమిమం కురుష్వ   || 10  ||

భాగ్యాబ్ధిపూర్ణశరదిందుసమూహరూపే

భక్తౌఘసస్యసితభిన్నపయోదపంక్తే   |

వేధోమనోఽమ్బుజనిబాలదివాకరాభే

శ్రీశారదాంబ సితచిత్తమిమం కురుష్వ   || 11  ||

ప్రాణాదివాయునిచయం వినిరుద్ధ్య చేతో

హృత్పంకజే చిరతరం తవ దివ్యమూర్తేః   |

ధ్యానం విభుం రచయితుం ప్రవిధాయ మాతః

శ్రీశారదాంబ సితచిత్తమిమం కురుష్వ   || 12  ||

కాణాదకాపిలముఖేషు సమస్తశాస్త్రే-

ష్వవ్యాహతాం ప్రతిభయా సహితాం మనీషాం   |

జాత్వప్యకర్ణవిషయేషు వితీర్య తూర్ణం

శ్రీశారదాంబ సితచిత్తమిమం కురుష్వ   || 13  ||

లక్ష్యేఽఖిలశ్రుతిమహాదిమవాక్యపంక్తేః

ఋక్షేశగర్వపరిశాతనదక్షవక్త్రే   |

యక్షేశపాశిముఖదిక్పతిపూజ్యపాదే

శ్రీశారదాంబ సితచిత్తమిమం కురుష్వ   || 14  ||

దారాత్మజావసథపాలనసక్తచిత్తాం-

స్తత్పాలనాత్తబహుదుఃఖతతీశ్చ సోఢ్వా   |

స్వప్నేఽపి సౌఖ్యరహితాన్పరిపాల్య లోకాన్

శ్రీశారదాంబ సితచిత్తమిమం కురుష్వ   || 15  ||

కారుణ్యపూర్ణనయనే కలికల్మషఘ్ని

కందర్పవైరిసహజే కమలాయతాక్షి   |

కస్తూరికామకరికాశ్రితగండభాగే

శ్రీశారదాంబ సితచిత్తమిమం కురుష్వ   || 16  ||

నైవాపహాయ నిజధర్మమతీవ కష్ట-

కాలేఽపి వాణి సుతరాం నిజధర్మవాంఛాః   |

భూయాసురాశు పురుషాః కురు తద్వదంబ

శ్రీశారదాంబ సితచిత్తమిమం కురుష్వ   || 17  ||

ఈహావిహీనజనసంతతిచింత్యమాన-

పాదారవిందయుగలే ప్రణతవ్రజాయ   |

ఈశిత్వసిద్ధిముఖసిద్ధితతిప్రదాత్రి

శ్రీశారదాంబ సితచిత్తమిమం కురుష్వ   || 18  ||

బాలారుణాధరవినిర్జితపక్వబింబే

చేలావధూతశరదభ్రసనస్తగర్వే   |

లీలావినిర్మితవిచిత్రజగత్సమూహే

శ్రీశారదాంబ సితచిత్తమిమం కురుష్వ   || 19  ||

భక్తిం వితీర్య సుదృఢాం తవ పాదపద్మే

దుఃఖాలయేషు విషయేషు విరక్తిదార్ఢ్యం   |

ఔత్సుక్యమప్యవిరలం నిగమాంతపాఠే

శ్రీశారదాంబ సితచిత్తమిమం కురుష్వ   || 20  ||

దూర్వాదిమత్తగజసింహధురంధరత్వం

శర్వాదిసేవితపదే తరసా వితీర్య   |

దుర్వాసనాం హృది గతాం తరసా ప్రమథ్య

శ్రీశారదాంబ సితచిత్తమిమం కురుష్వ   || 21  ||

పాదాంబుజప్రణతలోకవిచిత్రకావ్య-

కర్తృత్వదానచతురే చతురాస్యజాయే   |

కుంభీంద్రకుంభపరిపంథికుచే కుమారి

శ్రీశారదాంబ సితచిత్తమిమం కురుష్వ   || 22  ||

చాపల్యనైజజనిభూమిహృదంబుజాతం

పాపాంబురాశిదృఢమగ్నమపేతపుణ్యం   |

ఆత్మావబోధవిధురం గురుభక్తిహీనం

శ్రీశారదాంబ సితచిత్తమిమం కురుష్వ   || 23  ||

రంకోఽపి యత్కరుణయా ప్రభవేత్సురేశో

మూకోఽపి తద్గురుమహో వచసా జయేచ్చ   |

సా త్వం ప్రభూతధనవాగ్విభవప్రదాత్రి

శ్రీశారదాంబ సితచిత్తమిమం కురుష్వ   || 24  ||

అంబాశు బోధయ కృపాభరితైః కటాక్షై-

స్తత్త్వం పరం యదవలోకనతో న భూయాత్   |

భూయోఽపి జన్మ పదనమ్రతతేః కదాచిత్

శ్రీశారదాంబ సితచిత్తమిమం కురుష్వ   || 25  ||

కాలట్యభిఖ్యపురవాసనిబద్ధభావే

కాలప్రతీపసహజే కలకంఠకంఠే   |

కాయప్రభాజితతుషారసితాంశుశోభే

శ్రీశారదాంబ సితచిత్తమిమం కురుష్వ   || 26  ||

యత్త్వం హి వీక్షణలవేన నతార్భకాణాం

సంపోషణం ప్రకురుషే జగదంబ సార్థం   |

మీనాంబకత్వమభజద్భవతీహ తస్మాత్

శ్రీశారదాంబ సితచిత్తమిమం కురుష్వ   || 27  ||

అష్టాంగయోగమఖిలం తరసోపదిశ్య

నీత్వా చ మధ్యపదవీం సహశక్తివాయుం   |

చేతశ్చ ధామని పరే దృఢమారచయ్య

శ్రీశారదాంబ సితచిత్తమిమం కురుష్వ   || 28  ||

ఐక్యావబోధనకృతే ప్రణమజ్జనానాం

వక్త్రే విధుత్వమథ నేత్రయుగే ఝషత్వం   |

మధ్యే చ పంచముఖతాం పరిధారయంతీ

శ్రీశారదాంబ సితచిత్తమిమం కురుష్వ   || 29  ||

శ్రీశంకరార్యకరపంకజపూజితాంఘ్రే

పాశం విభిద్య తరసా భవనామభాజం   |

సాశంసదాహివిషయేఽప్యుపభుక్తపూర్వే

శ్రీశారదాంబ సితచిత్తమిమం కురుష్వ   || 30  ||

కీరార్భకప్రవిలసత్కరపంకజాతే

స్వారాజ్యదానపరితోషితనమ్రవృందే   |

స్మేరాస్యకాంతిపరిధూతసుధాంశుబింబే

శ్రీశారదాంబ సితచిత్తమిమం కురుష్వ   || 31  ||

కారుణ్యసాగరనిమగ్నహృదంబుజాతే

లావణ్యజన్మసదనీకృతనైజదేహే   |

కారుణ్యనిత్యవిహృతేర్నిలయాంగసౌధే

శ్రీశారదాంబ సితచిత్తమిమం కురుష్వ   || 32  ||

శ్రీశేశపద్మజముఖామరపూజితాంఘ్రే

శ్రీబోధదాననిరతే ప్రణమజ్జనేభ్యః   |

శ్రీకంఠసోదరి కృపామృతవరిరాశే

శ్రీశారదాంబ సితచిత్తమిమం కురుష్వ   || 33  ||

పూర్ణానదీతటవిహారవిలోలచిత్తే

తూర్ణానతేష్టతతిదాననిబద్ధదీక్షే   |

చూర్ణాయితాఖిలచిరాత్తహృదంధకారే

శ్రీశారదాంబ సితచిత్తమిమం కురుష్వ   || 34  ||

వైరాగ్యజన్మనిలయైః పరిసేవ్యమానే

వైయాసకిప్రముఖమౌనిజనైర్నితాంతం   |

సచ్చిత్సుఖాత్మకతనో విధిపుణ్యరాశే

శ్రీశారదాంబ సితచిత్తమిమం కురుష్వ   || 35  ||

యాం వేత్తుమిచ్ఛతి మఖానశనాద్యుపాయై-

ర్లోకే ద్విజావలిరసౌ బహుపుణ్యపాకాత్   |

సోపాయహీనమపి నైజకృపాతిరేకాత్

శ్రీశారదాంబ సితచిత్తమిమం కురుష్వ   || 36  ||

ఇతి శృంగేరి శ్రీజగద్గురు శ్రీ సచ్చిదానంద శివాభినవనృసింహ భారతీ స్వామిభిః 

విరచితా శ్రీ శారదాంబా స్తోత్ర మాలికా సంపూర్ణా.